Əli Əlirzayev: “Qeyri-neft sektoru həm daxili tələbatı ödəmək, həm də xarici bazarlara çıxmaq üçün mühüm əhəmiyyət kəsb edir, bu sahənin potensialı da böyükdür”
Məlumatlara görə, bu ilin yanvar ayında ölkənin iqtisadi və sosial sahələrinin inkişafı üçün bütün maliyyə mənbələrindən əsas kapitala yönəldilmiş 960,3 mln. manat vəsaitin 362,7 mln. manatı və yaxud 37,8 faizi qeyri-neft sektoruna sərf edilib və bu sektorda investisiyaların məbləği ötən illə müqayisədə 68 faiz artıb.
Dövlət Statistika Komitəsinin yaydığı məlumatda qeyd olunur ki, ümumi sərmayənin 72,4 faizi bilavasitə tikinti-quraşdırma işlərinin yerinə yetirilməsinə sərf edilib, istifadə olunmuş vəsaitin 83,5 faizi məhsul istehsalı obyektlərinin, 11 faizi xidmət sahələri üzrə obyektlərin, 5,5 faizi isə ümumi sahəsi 121 min kvadratmetr olan yaşayış evlərinin tikintisinin payına düşüb.
Daxili mənbələrdən əsas kapitala yönəldilmiş vəsait ümumi sərmayənin 52,1 faizini təşkil edib. Əsas kapitala yönəldilmiş sərmayənin ümumi dəyərində müəssisə və təşkilatların vəsaitləri 81,4 faiz, bank kreditləri 6,7 faiz, büdcə vəsaitləri 6,1 faiz, əhalinin şəxsi vəsaitləri 5,2 faiz, büdcədənkənar fondların vəsaitləri isə 0,6 faiz təşkil edib. Ekspertlər Azərbaycanda qeyri-neft sektoruna investisiyaların 68 faiz artmasının gözlənilən olduğunu düşünürlər.
İqtisadçı-ekspert Əli Əlirzayev “Bakı-Xəbər”ə açıqlamasında qeyd etdi ki, qeyri-neft sektoruna yatırılan investisiyaların həcmi artmaqda davam edir: “Qeyri-neft sektoru geniş sahədir. Bu səbəbdən də qeyri-neft sektorunda yaşanan inkişaf gözləniləndir. Kənd təsərrüfatı, infrastruktur, sənaye və digər sahələr bu sektora aiddir. Nəzərə almaq lazımdır ki, ümumdaxili məhsulda qeyri-neft sektorunun payı artır”.
Həmsöhbətimizin sözlərinə görə, neft sektorundan fərqli olaraq, qeyri-neft sektoru həm daxili tələbatı ödəmək, həm də xarici bazarlara çıxmaq üçün mühüm əhəmiyyət kəsb edir: “Onu da nəzərə almaq lazımdır ki, bu sahənin potensialı da böyükdür. Aqrar məhsulların istehsalı, onun emalı, xammal şəklində ixracatı böyük əhəmiyyət daşıyır. Aparılan araşdırmalar zamanı sübut olunub ki, qeyri-neft sektoru daha geniş və gəlir gətirən sahədir. Həmçinin, bu sahə əhalinin tələbatı üçün zəruridir”.
İqtisadçının fikrincə, qeyri-neft sektorunun bir çox sahələrinə investisiya qoyuluşu artıb. Əsasən kənd təsərrüfatı və turizm sektoruna yatırılan investisiyaların həcmi üstünlük təşkil edir. Həmçinin, rayon və kənd ərazilərində turizmin inkişafı əsas prioritet istiqamətlərdən biri seçilib. Gəlmə turizmin artması bu sahəyə yatırılan investisiyaları artırıb.
Ə.Əlirzayev onu da vurğuladı ki, qeyri-neft sektoruna yatırılan investisiyaların həcminin artması iş yerlərinin sayının artmasına səbəb olur.
Günel CƏLİLOVA
