Əkrəm Həsənov: “Bu işi nisbətən bilən şəxslər banklara uzunmüddətli deyil, qısamüddətli depozit qoyurlar”
Məlumatlara görə, kiçikhəcmli depozitlər banklardan çıxarılır. Əvəzində isə orta və iri məbləğli depozitlərin həcmi artıb. Maliyyə Bazarlarına Nəzarət Palatasının bir müddət öncə yaydığı məlumatda qeyd olunur ki, Azərbaycanda 2016-cı ilin ilk rübündə 50 min manatadək olan depozitlər 361 mln. manat, 50-500 min manatlıq depozitlər 345 mln. manat, 500 mindən artıq olan iri depozitlər isə 400 mln. manat azalıb. Fərdi depozitlər azalma göstərdiyi halda, korporativ depozitlər artaraq azalmanı kompensasiya edib.
Kiçikhəcmli depozitlərin həcminin azalması, əvəzində isə orta və iri əmanətlərin həcminin artması barədə fikir bildirən bank sahəsi üzrə mütəxəssis Əkrəm Həsənov “Bakı-Xəbər”ə açıqlamasında bunları qeyd etdi: “Banklardan kiçikhəcmli əmanətlərin çıxarılması qeydə alınır. Bunun səbəbi onunla bağlıdır ki, əhalinin gəliri azalır. Həmçinin, əhalinin bank sisteminə etimadı tam olaraq sıradan çıxıb. Son zamanlar tək bizdə deyil, bütün dünyada banklarda kiçikhəcmli əmanətlərin faizi azalır. İnsanlar banklarla bağlı yayılan xoşagəlməz məlumatları eşitdikcə, bank sisteminə etimad daha da azalır”.
Həmsöhbətimizin sözlərinə görə, maliyyə sistemindən anlayışı olan şəxslər başa düşürlər ki, hazırda Azərbaycanda maliyyə sistemini, yəni banklara yatırılan depozitləri ciddi təhlükə gözləmir. Təbii ki, risq hər zaman var: “Nəzərə almaq lazımdır ki, dünyada neftin qiymətinin artması, valyuta ehtiyatlarının həcminin yüksəlməsi milli valyutanın sabitləşməsinə səbəb olub. Banklarda da ən azı sığorta olunmuş əmanətlər bir qayda olaraq qaytarılır. Ötən illərlə müqayisədə banklara qoyulan əmanətlərdə sabitləşmə qeydə alınır. Onu da nəzərə almaq lazımdır ki, bu il ölkəmizdə prezident seçkiləri keçiriləcək. Eyni zamanda, Azərbaycan Demokratik Respublikasının 100 illiyidir. Belə bir ərəfədə devalvasiya və ya banklarda pulların batması kimi hallar yaşana bilməz. Bu işi nisbətən bilən şəxslər banklara uzunmüddətli deyil, qısamüddətli depozit qoyurlar. Belə olan halda, banklara az məbləğ deyil, orta və iri məbləğli əmanət qoyurlar”.
Günel CƏLİLOVA
