Müslüm İbrahimov: “Cocuq Mərcanlı bir ərazi olaraq Azərbaycanın ümumdaxili məhsulunda iştirak edəcək”
Məlum olduğu kimi, Cocuq Mərcanlıda həyat yenidən başlayıb. Artıq bu bölgədə yaşayan insanların məşğulluğu təmin olunub. Bu gün tək yerli iş adamları deyil, xaricilər də Cocuq Mərcanlıya yatırım edirlər.
Bu günlərdə iqtisadiyyat naziri Şahin Mustafayev Türkiyənin Azərbaycandakı səfiri Erkan Özoralla görüşüb. Görüş zamanı Türkiyənin Cocuq Mərcanlı kəndində layihə həyata keçirmək təşəbbüsünün bəyənildiyi və layihənin reallaşdırılmasına hər cür dəstək göstəriləcəyi bildirilib.
İqtisadiyyat Nazirliyinin yaydığı məlumatda qeyd olunur ki, görüşdə Türkiyə tərəfi arıçılıq, heyvandarlıq, kiçik istixana təsərrüfatı və suvenir istehsalı sahələrini əhatə edən layihə barədə məlumat verib. Bildirilib ki, layihəyə uyğun olaraq, Cocuq Mərcanlıda 15 ailə üçün arıçılıq təsərrüfatı yaradılacaq və lazımi avadanlıqlarla təchiz ediləcək. Layihə çərçivəsində, həmçinin, 150 başlıq südçülük təsərrüfatının yaradılması da nəzərdə tutulur.
Bundan başqa, layihəyə əsasən, Cocuq Mərcanlıda 15 kiçikhəcmli istixana qurulacaq və damcı suvarma sistemləri ilə təmin ediləcək, toxum, şitil və s. alınmasında dəstək göstəriləcək, ailələrə təlimlər keçiriləcək. İstixana təsərrüfatlarında kənd əhalisinin məşğulluğu təmin olunacaq, kənd əhalisinin bir sıra tərəvəz məhsullarına olan ehtiyacı yerli imkanlar hesabına ödəniləcək. Bundan başqa, layihə çərçivəsində suvenir istehsalı təşkil olunacaq ki, burada keramika və müxtəlif oyuncaqlar hazırlanacaq.
Layihənin reallaşdırılması nəticəsində istehsal olunan bütün məhsullar "Cocuq Mərcanlı" loqosu ilə satışa çıxarılacaq. Azərbaycan Dövlət İqtisad Universitetinin (UNEC) İqtisadiyyat kafedrasının müdiri, iqtisad elmləri doktoru Müslüm İbrahimov “Bakı-Xəbər”ə açıqlamasında qeyd etdi ki, istənilən bir məhsulun üzərində “Cocuq Mərcanlı” holoqramının olması müsbət haldır. Məhsulların üzərinə Cocuq Mərcanlı holoqramının vurulması ilk növbədə vətənpərvərlik amili kimi nəzərə alınmalıdır: “Onu da vurğulamaq lazımdır ki, bu hal bir tərəfdən reklam vasitəsi sayılacaq, həm də böyük bir məna daşıyır. Bəllidir ki, ermənilər tərəfindən istehsal olunan “Arsax” məhsulları bir neçə ölkənin sərgilərində iştirak edib. Təbii ki, bu hala qarşı biz hər zaman etiraz etmişik. Cocuq Mərcanlı məhsullarını dünya sərgilərinə çıxarmaqla torpaqlarımızın işğal altında olmasını beynəlxalq arenaya nümayiş etdirmiş olacağıq. Həmçinin, torpaqların geri qaytarılması ilə bağlı Azərbaycan hər bir istiqamətdə məlum problemin həll olunmasına hazırdır”.
Həmsöhbətimizin sözlərinə görə, Cocuq Mərcanlı bir ərazi olaraq Azərbaycanın ümumdaxili məhsulunda iştirak edəcək. Artıq bu ərazi iqtisadi struktura daxil olacaq. Bu hal işğal altında olan torpaqlarla bağlı danışıqlarda müsbət məqam kimi istifadə olunacaq.
Günel CƏLİLOVA
