Fikrət Yusifov: “Bu sahədən ixrac potensialımız daha da genişlənəcək”
Sovet dövrünün sonları və müstəqilliyin ilk illərində, digər sahələrdə olduğu kimi, sitrus meyvəçiliyində də tənəzzül özünü göstərməyə başladı. Nəticədə Azərbaycanda sitrus meyvələrinin yetişdirildiyi sahələr sürətlə azalmağa başladı. Bu da, öz növbəsində, sitrus meyvəçiliyi ilə məşğul olan şəxslərin maddi durumuna mənfi təsir göstərdi. Çünki o zaman becərilən sitrus meyvələri əsasən keçmiş SSRİ respublikalarına göndərilirdi.
Azərbaycanda sitrus meyvəçiliyi əsasən Lənkəran, Masallı və Astarada inkişaf edib. Bununla yanaşı, Zaqatala rayonunda da bu sahəyə diqqət yetirilir. Sözügedən bölgələrdə sitrus meyvə bağlarının sahəsini artırmaq üçün müxtəlif imkanlar var və bunun üçün ilk növbədə dövlət dəstəyi mühümdür.
Görünən odur ki, bu məsələnin də həllinə qərar verildi. Belə ki, Prezident İlham Əliyev “Azərbaycan Respublikasında sitrus meyvəçiliyinin inkişafına dair 2018-2025-ci illər üçün Dövlət Proqramı”nın təsdiq edilməsi haqqında” Sərəncam imzalayıb. Proqramın icrası nəticəsində 2025-ci ilədək Azərbaycanda sitrus meyvələri istehsalının həcminin 100 min tona çatdırılması nəzərdə tutulur. Bu, Azərbaycanda sitrus meyvəçiliyi ənənələrinin inkişaf etdirilməsinə, sitrus meyvələrinə olan daxili tələbatın ödənilməsinə və idxaldan asılılığın azaldılmasına, sitrus meyvəçiliyi ilə məşğul olan rayonlarda əhalinin həyat şəraitinin yaxşılaşdırılmasına təsir göstərməklə ölkənin aqrar potensialını gücləndirəcək. Bununla yanaşı, sitrus meyvə istehsalı və emalı sahələrinə yerli və xarici investisiyaların cəlb edilməsi istiqamətində tədbirlərin görülməsi də nəzərdə tutulub.
Maraqlıdır, bütün bunlar ölkədə sitrus meyvəçiliyinin inkişafına necə təsir göstərəcək?
Sözügedən məsələni “Bakı-Xəbər”ə şərh edən “Ekonomiks” Beynəlxalq İqtisadi Araşdırmalar Birliyinin sədri, iqtisad elmləri doktoru, professor Fikrət Yusifovun sözlərinə görə, məlum sərəncam daha çox sitrus meyvələrin ixrac olunmasına gətirib çıxaracaq: “Azərbaycan hökuməti son illərdə ölkə iqtisadiyyatının daha sürətlə real sektora transformasiya olunması istiqamətində ciddi addımlar atır. Artıq ilkin nəticələr bu işin nə qədər sürətlə getdiyini deməyə tam əsas verir. Kimin nə deməsindən və nə yazmasından asılı olmayaraq, son iki ildə əldə olunan nəticələr qeyri-neft sektorunda əsaslı dəyişikliklərin baş verdiyini təsdiq edir. Aqrar sektorda, qeyri-neft sənayesində, tranzit yükdaşımalar və turizm sahəsində çox böyük bir dönüş yaranıb. Aqrar sektorun bütün sahələrində əldə olunan nəticələr əvvəlki illərlə müqayisədə dəfələrlə yüksəkdir. Pambıqçılıq, baramaçılıq, tütünçülük, fındıqçılıq kimi sahələrdə strateji məhsulların istehsalı sürətlə artır və bu məhsulların ixracından Azərbaycan indi əvvəlkindən daha çox valyuta gəlirləri əldə etməyə başlayıb. Ərzaq məhsullarının istehsalının artırılması öncə ölkədə ərzaq təhlükəsizliyinin təmin edilməsinə yaxşı əsas yaradır. Aqrar sektorda elə bir sahə yoxdur ki, dövlət bu gün oranın inkişafı ilə bağlı addım atmasın. Bütün sahələrə diqqət yetirilir. Onlardan biri də sitrusçuluğun inkişafıdır. Bununla bağlı ölkə Prezidentinin sərəncamı mühüm əhəmiyyət kəsb edir. Proqrama uyğun olaraq 2025-ci ilədək Azərbaycanda sitrus meyvələri istehsalının həcminin 100 min tona çatdırılması nəzərdə tutulur. Sitrus meyvələri istehsalının 100 min tona çatdırılması yetərincə böyük rəqəmdir. Deməli, bu sahədən ixrac potensialımız daha da genişlənəcək. Nəticədə sözügedən meyvə ixracından ölkəyə daxil olan gəlirlərin həcmi artacaq. Bu sahənin inkişafı məqsədilə xarici sərmayənin cəlb olunması nəzərdə tutulur ki, bu da öz səmərəsini verəcək”.
Cəmilə QARAYEVA
