Aydın Hüseynov: “Bu da iqtisadiyyatın şaxələndirilməsinə öz töhfəsini verəcək”
Beynəlxalq qurumlar Azərbaycanın kredit reytinqini yüksəldib. Belə ki, “Fitch” beynəlxalq reytinq agentliyi Azərbaycanın uzunmüddətli xarici və yerli valyutada defolt reytinqi üzrə proqnozuna yenidən baxıb. Məlum olub ki, ölkəmiz “stabil” reytinqə malik siyahıda yer alıb. Bundan əlavə, “Standard & Poor's” və “Moody's” da Azərbaycanın kredit reytinqini yüksəldib.
Ümumilikdə, nəzərə almaq lazımdır ki, bu cür reytinq siyahısı milli valyutanın möhkəmlənməsi ilə bərabər, ölkəyə xarici valyuta axınını da stimullaşdırır. O baxımdan bunun ölkədə işgüzar aktivliyin artırılması baxımından mühüm əhəmiyyəti var.
Başqa bir tərəfdən, Azərbaycan “2018 İqtisadi Azadlıq” indeksində də bir pillə irəliləyərək 180 ölkə arasında 67-ci yerdə qərarlaşıb. “Heritage Foundation” tərəfindən hazırlanan hesabata əsasən, Azərbaycan Asiya-Pasifik regionunda 43 ölkə arasında 14-cü yerdə qərarlaşıb. Hesabtda bunun iqtisadi islahatların nəticəsi olduğu vurğulanır. Sözügedən indeks üzrə Azərbaycan nəinki MDB ölkələrini, hətta Fransa, İtaliya və Yunanıstan kimi ölkələri də qabaqlayıb. Hesabtlarda irəliləyişin əsas səbəbi kimi isə stabil iqtisadi siyasət və aparılan islahatlar göstərilir.
Bütün bu deyilənlərin fonunda, Azərbaycanın kredit reytinqinin get-gedə daha da yüksəlməsi ölkə iqtisadiyyatı üçün nə vəd edir?
Məsələyə münasibət bildirən millət vəkili Aydın Hüseynovun sözlərinə görə, Azərbaycanın kredit reytinqinin yüksəlməsi ölkədə iqtisadi inkişafa ciddi təkan verəcək: “Dünyada tanınmış reytinq agentliklərinin Azərbaycana verdikləri dəyər yeni deyil. Zaman-zaman Azərbaycanla bağlı bənzər müsbət proqnozlar səslənib. Son illər isə bu tendensiya bir az da güclənib. Yəni əksər reytinq agentlikləri Azərbaycanla bağlı göstəriciləri yuxarı qaldırıblar. Bütün bunlar Azərbaycanda aparılan məqsədyönlü siyasətin, iqtisadi islahatların nəticəsidir. Həmçinin, ölkədə gedən iqtisadi inkişafın göstəricisidir. Bütün bunların fövqündə Prezident İlham Əliyevin apardığı məqsədyönlü siyasət dayanır. Dövlət başçısının gördüyü işlərin nəticəsidir ki, Azərbaycan ön sıralarda mövqe tutub. Bütün bunlar, əlbəttə ki, Azərbaycana marağı bundan sonra daha da artıracaq. Xarici investorların ölkəyə daha çox sərmayə qoymalarına şərait yaradacaq. Çünki bu kimi hesabatlar ölkə iqtisadiyyatına sərmayələrin cəlb olunmasında mühüm rol oynayır. Xarici investorlar bu kimi məqamlara xüsusi diqqət göstərirlər. İnvestorlar bu kimi cədvəllərə baxırlar və hansı ölkədə indikatorlar yaxşı səviyyədədirsə, ora sərmayə qoymaqla bağlı qərar verirlər. Bu baxımdan reytinq cədvəlində Azərbaycanla bağlı müsbət göstəricilər ölkə iqtisadiyyatı üçün yaxşı haldır. Hesab edirəm ki, bütün bunların nəticəsi olaraq xarici sərmayədarlar bundan sonra Azərbaycanın qeyri-neft sektoruna daha çox kapital qoymaqda maraqlı olacaqlar. Bu da iqtisadiyyatın şaxələndirilməsinə öz töhfəsini verəcək. Xarici investorlar sənayenin müxtəlif sahələrinin inkişafına maraq göstərəcəklər. Sənayenin istər emal, istərsə də istehsal sahələrinin inkişafı sürətlənəcək. Nəticədə neft sektorundan asılılıq əhəmiyyətli şəkildə azalacaq. Zatən, ölkədə aparılan siyasətin kökündə qeyri-neft sektorunu inkişaf etdirmək dayanıb”.
Vidadi ORDAHALLI
