Könül Nuriyeva: "Pul köçürmələrinin artmasının əsas səbəblərindən biri Azərbaycanda formalaşan investisiya mühitidir"
Bu ilin I yarısında Azərbaycana daxil olan pul baratlarının həcmi illik müqayisədə 58,3 % artaraq 459 mln. ABŞ dolları təşkil edib. Bu barədə Azərbaycan Mərkəzi Bankının yanvar-iyun ayları üzrə Pul Siyasəti İcmalında qeyd olunur.
İcmalda deyilir ki, hesabat dövründə iqtisadi tərəfdaş ölkələrində yaranmış vəziyyət qeyri-neft ixracı ilə yanaşı, ölkəyə daxil olan pul baratlarının dinamikasına da təsir edib.
Onu da qeyd edək ki, 2016-cı ilin I yarısında ölkəyə daxil olan pul kütləsinin həcmi 2015-ci ilin eyni dövrü ilə müqayisədə 46,9 % azalaraq 290 mln. dollar təşkil edib.
Azərbaycana pul köçürmələrinin kəskin artması nə ilə əlaqədardır? Məsələ barədə fikir bildirən iqtisadçı-ekspert Könül Nuriyeva "Bakı-Xəbər"ə açıqlamasında qeyd etdi ki, son illər Azərbaycana pul köçürmələri artıb: "Pul köçürmələrinin artmasının əsas səbəblərindən biri Azərbaycanda formalaşan investisiya mühitidir. Ölkənin əsas siyasətinin bir hissəsi xarici investorların ölkəyə cəlb olunmasıdır. Elə ölkələr var ki, oranın əsas inkişafı sırf daxili investisiya hesabına olur. Ancaq Azərbaycanda isə qurulmuş siyasət imkan verir ki, xarici investorları ölkəyə cəlb edək. Xarici investorların bizim ölkəyə maraq göstərməsinin bir neçə səbəbi var. Onlardan biri bizdə maliyyə rentabelliyinin olmasıdır. Təbii resursların olması və investisiya mühitinin yüksək dərəcədə olması da bu sahəyə öz təsirini göstərir".
Həmsöhbətimizin sözlərinə görə, investisiya mühitinin yaradılması ölkəyə pul axını deməkdir: "Bu hal hər iki ölkə üçün fayda verəcək. Həm investisiya yatıran ölkəyə, həm də investisiya yatırılan ölkə olaraq Azərbaycana fayda verəcək. Belə olan halda, Azərbaycan tərəfi həm gəlir əldə edir, həm də sosial-iqtisadi mühitdə dəyişiklik baş verir. Azərbaycanda ən vacib olan məsələlərdən biri də işsizliyin aradan qaldırılmasıdır. Ölkəyə nə qədər çox pul gələrsə, məşğulluq problemi də aradan qalxar".
K.Nuriyeva onu da vurğuladı ki, pul köçürmələrinin artmasının müsbət cəhətlərindən biri də devalvasiya zamanı qeydə alınan iqtisadi problemlərin aradan qalxmasına səbəb olmasıdır: "Bəllidir ki, bu gün ölkədə xarici valyuta olan dollar qıtlığı yaşanır. Ölkəyə gələn gəlir isə dollarla olur. Neft gəlirlərinin azalması dollar axınının azalmasına səbəb oldu. Ancaq investisiya mühitinin yaradılması və xarici turistlərin ölkəyə maraq göstərməsi dolların artmasına səbəb oldu. Belə olan halda, manatın durumu stabilləşdi".
İqtisadçının sözlərinə görə, son illər ölkəmizdə keçirilən beynəlxalq əhəmiyyətli tədbirlər turistlərin ölkəmizə maraq göstərməsinə səbəb olub: "Formula 1", "Bakı-2017" İslam Həmrəyliyi Oyunları və digər tədbirlər nəticəsində ölkəyə külli miqdarda maliyyə axını baş verdi".
Günel CƏLİLOVA
