Qulu İsmayılov: "Biz bu asılılığı daxili istehsal hesabına ödəsək və tütün məhsullarının ixracını təmin edə bilsək..."
Prezident İlham Əliyev Qaxda keçirilən barama, tütün və fındıq istehsalının inkişafı məsələlərinə dair respublika müşavirəsində bildirib ki, tütünçülüyün inkişafına dair Dövlət Proqramı qəbul ediləcək.
Dövlət başçısı bildirib ki, Azərbaycan vətəndaşları az siqaret çəkməlidirlər. Çünki bu zərərli vərdişdir və insanın sağlamlığına çox böyük təhlükələr, problemlər yaradır. Ona görə müvafiq tədbirlər görüləcək ki, Azərbaycan vətəndaşları bu vərdişdən tədricən əl çəksinlər: "Ancaq bu gün Azərbaycanda siqaret istehlakı var. Mənə verilən məlumata görə, Azərbaycanda 10 milyard siqaret istehlak olunur. Onlardan isə cəmi 1 milyard 600 milyonu Azərbaycanda istehsal edilir. Yəni 9 milyard siqaret Azərbaycana idxal edilir. Ona görə biz daxili bazarı təmin etmək və xüsusilə xarici bazarlara çıxmaq üçün tezliklə Azərbaycanda siqaret istehsalını inkişaf etdirməliyik. İlk növbədə daxili bazar idxaldan asılı olmamalıdır ki, valyuta ölkədən getməsin və ondan sonra biz ixrac məsələləri ilə də məşğul olacağıq".
Prezident, həmçinin, yeni və ən müasir texnologiyalarla təchiz edilmiş siqaret fabriklərinin yaradılmalı olduğunu da bildirib. Qeyd edib ki, son məhsula qədər tütün istehsalı Azərbaycanda təmin edilməlidir: "2021-ci ilə qədər tütün istehsalı üçün əkin sahələri iki dəfə genişləndirilməlidir. İndiki 3200 hektardan təqribən 6 min hektara çatdırılmalıdır. Buna imkan var və aidiyyəti qurumlar bu işlərlə ciddi məşğul olsunlar".
Tütünə olan tələbat daxili istehsal hesabına ödənərsə, Azərbaycan nə qədər irəli düşə bilər?
İqtisadçı Qulu İsmayılov qəzetimizə bildirdi ki, istənilən ölkənin tütünə tələbatı yüksəkdir: "Düzdür, ölkələrin çoxu çalışır ki, bundan asılılığı aşağı salsın. Çünki orqanizm üçün zərərlidir. İlham Əliyevin özü də bu faktoru xüsusi vurğuladı. Təqdim olunan göstəricilərdən belə anlaşılır ki, biz daxili istehsalı gücləndirsək, ölkəmizə xeyli valyuta qazandıra bilərik. Bu istiqamətdə ixracı təşviq edə bilsək, qazancımız daha da artacaq. Orta məhsuldarlığı 2 ton götürsək, hər il Azərbaycanda 12 min ton quru tütün istehsal olunacaq və bu, ölkəmizə böyük xeyir gətirəcək, valyutamız xaricə getməyəcək, əksinə, ixrac imkanlarımız da yarana bilər. Ölkə başçısı bildirdi ki, bunları stimullaşdırmaq üçün tütünçülüyün inkişafına dair Dövlət Proqramı qəbul ediləcək. Bu proqramın qəbulu bir daha onu göstərir ki, dövlət bu sahəyə çox ciddi fikir verir. Biz daxili bazarı təmin etmək və xüsusilə xarici bazarlara çıxmaq üçün tezliklə Azərbaycanda siqaret istehsalını inkişaf etdirməliyik. İlk növbədə daxili bazar idxaldan asılı olmamalıdır ki, valyuta ölkədən getməsin və ondan sonra biz ixrac məsələləri ilə də məşğul olacağıq. Hesablamalara görə, hər il xaricə təxminən 150 milyon dollar valyuta gedir. Biz bu asılılığı daxili istehsal hesabına ödəsək və tütün məhsullarının ixracını təmin edə bilsək, təxminən o qədər də valyutanı ölkəyə gətirə bilərik".
Məhəmmədəli QƏRİBLİ
