Vahid Məhərrəmov: "Elə etməliyik ki, Azərbaycanda tütünçülük, pambıqçılıq və baramaçılıq faydalı biznesə çevrilsin"
Avqustun 4-də Qaxda Azərbaycan Respublikasının Prezidenti İlham Əliyev barama, tütün və fındıq istehsalının inkişafı məsələlərinə dair respublika müşavirəsində bir sıra məsələlərə toxunub.
Dövlət başçısının sözlərinə görə, pambıqçılıq, demək olar ki, məhv olurdu. O cümlədən tütünçülüyə maraq göstərilmirdi, baramaçılıq isə ümumiyyətlə gündəlikdən çıxarılmışdı: "Ona görə bu sahələrə göstərilən diqqət nəticəsində cəmi iki il ərzində dönüş yarandı. Pambıq istehsalı artdı. 2015-ci ildə cəmi 17 min hektarda pambıq əkilirdisə, bu il əkin sahələri 136 min hektara çatdı, cəmi iki il ərzində təxminən 10 dəfə artdı. İstehsal da buna uyğun şəkildə artır və artacaq. Biz indi böyük ixrac imkanlarımızla xarici bazarlara çıxırıq. Nəinki xam pambıq, mahlıc, eyni zamanda, Mingəçevirdə yaranmaqda olan böyük yüngül sənaye kompleksinin fəaliyyətə başlaması nəticəsində biz hazır məhsul ixrac edəcəyik".
Dövlət başçısının fikrincə, tütünçülüklə bağlı atılmış ilk addımlar öz nəticəsini verir: "Bu müşavirədən sonra çox ciddi proqram qəbul ediləcək. Azərbaycanda baramaçılıq çox geniş vüsət alıb. Fermerlər, kəndlilər tərəfindən ən çox maraq göstərilən sahə də baramaçılıqdır. Çünki dövlət hər şeyi öz üzərinə götürüb, bütün lazımi materialları, tingləri verir, bütün sahələr üzrə subsidiyalar verir. Kümçülər 30-40 gün ərzində yaxşı gəlir əldə edirlər. Ona görə bu ənənəvi sahələrin inkişafı ilə bağlı əlavə tədbirlər görüləcək".
Prezidentin açıqlamasından o da məlum olub ki, Azərbaycan xam pambıq, mahlıcla yanaşı, hazır məhsul da ixrac edəcək.
Ümumilikdə, tütünçülük, pambıqçılıq və baramaçılığın yüksək inkişafını təmin edə bilsək, yaxın 5 ildə Azərbaycana nə qədər valyuta gələ bilər?
Məsələyə münasibət bildirən kənd təsərrüfatı sahəsi üzrə ekspert Vahid Məhərrəmovun sözlərinə görə, sözügedən sahələr inkişaf etsə, ölkəyə müəyyən həcmdə valyuta daxil ola bilər: "Konkret demək çətindir ki, nə qədər valyuta daxil olacaq. Məsələ ondadır ki, bu, dünya bazarında mövcud olan qiymətdən asılıdır. Yəni bu, bizim istehsal etdiyimiz məhsulun nə qədər rəqabətqabiliyyətli olmasından asılıdır. Burada da tələb olunan çoxlu şərtlər var. Dünya bazarında sözügedən məhsullara tələbat yüksəlsə, o zaman valyuta gəlirləri arta bilər. Sözügedən sahələrin davamlı gəlirli olması, ölkəyə valyuta gətirməsi barədə proqnoz vermək çətindir. Çünki dünya bazarında görürsən ki, tələbat dəyişir. Bütün hallarda elə etməliyik ki, Azərbaycanda tütünçülük, pambıqçılıq və baramaçılıq faydalı biznesə çevrilsin. Sahibkarlar rəqabətqabiliyyətli məhsul istehsal etsinlər. Belə olsa, o zaman sözügedən sahələr ölkəyə gəlir gətirə bilər. Hesab edirəm ki, bu məsələdə əvvəlcə sözügedən sahələr üzrə elm inkişaf etdirilməlidir. Bu il istehsal olunacaq baramadan təxminən 1 milyon dollar əldə olunacaq. Qarşıdakı illərdə barama istehsalının 6 min tona çatdırılması nəzərdə tutulub. Dövlət büdcəsi hesabına bu sahəyə böyük vəsait ayrılıb".
Vidadi ORDAHALLI
