Rəsul Cahangirli: "Ölkədə makroiqtisadi sabitliyin təmin olunması imkan verir ki, qeyri-neft sektorunun inkişafı həyata keçirilsin"
Qaxda keçirilən respublika müşavirəsində çıxış edən Prezident İlham Əliyevin sözlərinə görə, Azərbaycan iqtisadiyyatı inkişaf edir. Onun fikrincə, bu ilin altı ayının nəticələri bunu deməyə imkan verir:
"Qeyri-neft iqtisadiyyatımız, qeyri-neft sənayemiz artdı. İxrac 36 faiz, qeyri-neft ixracı 27 faiz artıb. Kənd təsərrüfatı ixracı 40 faizdən çox artıb. Biz 6 ayda valyuta ehtiyatlarını nəinki qoruya bilmişik, görülmüş tədbirlər, düşünülmüş iqtisadi siyasət nəticəsində 3 milyard dollar əlavə valyuta gəlib. Azərbaycana birinci altı ayda 5 milyard investisiya qoyulub. Təsadüfi deyil ki, Davos Ümumdünya İqtisadi Forumu ölkə iqtisadiyyatını rəqabətqabiliyyətliliyinə görə 37-ci yerə layiq görüb. Bu, MDB məkanında birinci göstəricidir. Bu, sadəcə olaraq, görülmüş işlərin təzahürüdür".
Ölkə başçısının açıqlamasından o da məlum olub ki, makroiqtisadi sabitlik təmin edilib, manatın məzənnəsi sabitdir: "Dövlət xətti ilə ölkə iqtisadiyyatına sərmayə qoyulur. Özəl sektor da buna qoşulub. Qırxa yaxın aqropark yaradılır. Yaxın 1-2 il ərzində bu aqroparklarda istehsal olunacaq məhsul böyük bazarlara ixrac ediləcək, daxili ərzaq təhlükəsizliyi təmin ediləcək".
Bütün bu deyilənlərin fonunda, ölkənin valyuta ehtiyatlarının artım tendensiyası müasir dünya reallıqları baxımından neçə illər davam edə biləcək?
Məsələyə münasibət bildirən ekspert Rəsul Cahangirlinin fikrincə, bu tendensiya uzun müddət davam edəcək. O bunu bir sıra arqumentlərlə əlaqələndirdi: "Məsələ ondadır ki, aparılan struktur islahatları artıq, praktiki olaraq, öz səmərəsini verməyə başlayıb. Ölkədə makroiqtisadi sabitliyin təmin olunması imkan verir ki, qeyri-neft sektorunun inkişafı həyata keçirilsin. Neft sektorundan asılılığın azaldılması istiqamətində ciddi işlər görülür. Manatın "üzən məzənnə"yə keçməsi imkan verdi ki, Azərbaycan öz valyuta ehtiyatlarını qoruya bilsin. Çünki hər il məzənnənin sabit saxlanması üçün bir milyard dollara qədər vəsait xərclənirdi. Bu da valyuta ehtiyatlarına mənfi təsir göstərirdi. Son illər Azərbaycanda qeyri-neft sektorunun, xüsusən də kənd təsərrüfatının inkişafına yönəlik tədbirlər müsbət istiqamətdə davam edir. Bütün bunlar o qənaətə gəlməyə əsas verir ki, ölkənin valyuta ehtiyatlarının artım tendensiyası hələ uzun müddət davamlı olacaq. Çünki Azərbaycanın ixrac potensialı artdıqca, ölkəyə daha çox valyuta daxil olacaq".
Vidadi ORDAHALLI
