Fikrət Yusifov: "Əsas məqsəd yükdaşıyanları ölkəyə cəlb etməkdir"
Məlum olduğu kimi, Prezident İlham Əliyev "Yeni Bakı Beynəlxalq Dəniz Ticarət Limanı Kompleksinin tikintisinin sürətləndirilməsi ilə bağlı əlavə tədbirlər haqqında" Sərəncam imzalayıb. Sərəncama əsasən, İqtisadiyyat Nazirliyinə 30,0 (otuz) milyon manat ayrılıb.
Vəsaitin ayrılmasında məqsəd sözügedən dəniz limanının tikintisini sürətləndirməkdir. Azərbaycanı regionun ticarət mərkəzinə çevirmək məqsədilə son illər ölkənin strateji coğrafi mövqeyindən səmərəli istifadə etməklə tranzit və nəqliyyat xidmətlərinin inkişafı, nəqliyyat infrastrukturunun təkmilləşdirilməsi və tranzit potensialının daha da artırılması üçün konkret hədəflərə istiqamətlənmiş kompleks tədbirlər həyata keçirilib.
Bu tədbirlər çərçivəsində yerli və beynəlxalq daşımaların idarə olunması mexanizmi təkmilləşdirilib, ölkənin nəqliyyat sisteminin beynəlxalq nəqliyyat sisteminə inteqrasiyası genişləndirilib. Həmçinin, yeni Bakı Beynəlxalq Dəniz Ticarət Limanı Kompleksinin tikintisinə başlanıb.
Azərbaycanın regionun mühüm nəqliyyat və logistika mərkəzinə çevrilməsi siyasətinin tərkib hissəsi olan, "Şərq-Qərb" və "Şimal-Cənub" nəqliyyat dəhlizlərinin qovşağında yerləşən yeni Bakı Beynəlxalq Dəniz Ticarət Limanı Kompleksi ölkənin tranzit imkanlarının yüksəldilməsində həlledici rola malikdir.
Maraqlıdır, bəs ekspertlər tikilməkdə olan yeni Bakı Beynəlxalq Dəniz Ticarət Limanı Kompleksinin potensialı baradə hansı fikirdədir? Bunun əhəmiyyətini necə dəyərləndirirlər?
Sözügedən məsələni dəyərləndirən "Ekonomiks" Beynəlxalq İqtisadi Araşdırmalar Birliyinin sədri, iqtisad elmləri doktoru Fikrət Yusifovun fikrincə, liman fəaliyyətə başladıqdan sonra Azərbaycan böyük miqdarda valyuta qazanacaq: "Milyonlarla ton yükün oradan daşınmasından söhbət gedir. Bu, Azərbaycanın dövlət başçısının özünün təşəbbüsü ilə yaradılan, Xəzər hövzəsində ən böyük limandır. Azərbaycan regionda belə bir tranzit yükdaşımalar həyata keçirmək üçün çox uyğun bölgədə yerləşir. Şərqlə qərb, cənubla şimal arasında yükdaşımaları həyata keçirmək olar. Bu baxımdan həm də quru yolların və dəmir yolunun istifadəsi nəzərdə tutulub. Ötən il tranzit yükdaşımaların tənzimlənməsi ilə bağlı xüsusi qərar qəbul olundu və Prezident bununla əlaqədar sərəncam verdi. Bu məsələlərin daha çevik tənzimlənməsi ilə əlaqədar "vahid pəncərə" sistemi ilə xüsusi struktur da yaradıldı. Bütün bunların hamısının məqsədi ondan ibarətdir ki, yükdaşımalarda tarif siyasətindəki pərakəndəlik aradan qaldırılsın. Yəni dəmir yolu, quru yolla Azərbaycan üzərindən yük daşımaq istəyənə sahənin maraqları prizmasından yanaşılıb təkliflər edilməsin. Burada söhbət bütövlükdə Azərbaycan iqtisadiyyatının maraqlarından gedir. Əsas məqsəd yükdaşıyanları Azərbaycana cəlb etməkdir. Hazırda bu sahədə də bazarda böyük rəqabət var. Aydındır ki, bölgədə, demək olar ki, bütün bazarlar tutulub. Ancaq bu sahədəki rəqabət başqadır. Hər bir ölkə istəyər ki, onun üzərindən yükdaşımalar həyata keçirilsin. Azərbaycan da öz coğrafi mövqeyindən istifadə etmək istədiyi üçün, bu cür addımlar atılır. Həmçinin məqsəd Azərbaycan üzərindən bu yükdaşımaları artırmaqdır".
Vidadi ORDAHALLI
