Qulu İsmayılov: "Çin 10 milyard dollarlıq İpək Yolu Fondu da yaradıb"
Azərbaycanlı millət vəkilləri ATƏT Parlament Assambleyasında İpək Yoluna dəstək qrupunun yaradılmasına təşəbbüs göstərir. Bunu "Belta" agentliyinə müsahibəsində Belarus parlamentinin Nümayəndələr Palatasının sədri Vladimir Andreyçenko deyib.
Onun sözlərinə görə, bu qrup səmərəli iqtisadi və ticarət münasibətlərinə yardım platforması rolunu oynayacaq: "Bu təşəbbüsün məqsədi nəqliyyat dəhlizlərinin inkişafı, ticarət və daşıma prosedurlarının sadələşdirilməsi, şəxslərin, xidmət və malların, eləcə də investisiyaların sərbəst hərəkətinin inkişafına xidmət etməkdir".
Azərbaycan nümayəndə heyətinin bu təşəbbüsünü necə dəyərləndirmək olar?
İqtisadçı Qulu İsmayılov qəzetimizə bildirdi ki, Azərbaycanın həmin layihəyə dəstək verməsi lazımdır: "Çünki həmin layihənin bizim və region üçün böyük önəmi var. İpək Yolu layihəsi hazırda təkrar formaya düşən iqtisadiyyatın sadəcə bir hissəsidir. Bu layihə həm bizim, həm də Türkiyə üçün önəmlidir. Çünki Asiyadan gələn yollar Avropaya ancaq Türkiyə ərazisindən keçə bilər. Bu baxımdan Mərkəzi Asiya və Xəzərin yanacaq xammalı da Türkiyə ərazisindən ötürüləcək. Deməli, bu yolda Qafqazın timsalında Azərbaycanın da geosiyasi mövqeyi ön plana çıxır. Hesab edirəm ki, İpək Yolu Azərbaycansız reallaşmayacaq. Azərbaycan əlindəki müasir keçid infrastrukturları ilə ən qısa yol sayılır.
Xüsusilə 2008-ci ildə yaşanan qlobal iqtisadi böhranadək Çin ikirəqəmli böyümə sürətinə malik olub. 2008-ci ildən sonra böyümə sürəti azalsa da, 2011-ci ildən sonra vəziyyəti nisbətən düzəlib. Bu gün Çin yeni inkişaf modelini icra edir. İpək Yolu ölkə daxilində iqtisadi-sosial inkişafa təkan verəcək və ticarəti daha da canlandıracaq. Hətta 2014-cü ildə Çin 10 milyard dollarlıq İpək Yolu Fondu da yaradıb. Eyni zamanda, layihəyə dəstək məqsədilə Asiya İnfrastruktur Bankının fəaliyyətini də artırıb. Göründüyü kimi, bu layihənin reallaşmasına qəti şübhə yoxdur. Bu baxımdan da Azərbaycan üçün böyük önəm daşıyan layihə ilə bağlı parlamentarilərimizin göstərdiyi lobbiçilik təşəbbüsünü alqışlamalıyıq".
Məhəmmədəli QƏRİBLİ
