“Xarici kreditlər üzrə ödənişlər müqavilə şərtlərinə uyğunlaşdırılmalıdır”
"Azərbaycan Respublikasının 2017-ci il dövlət büdcəsi haqqında” Azərbaycan Respublikası Qanununda dəyişikliklər edilməsi barədə” Azərbaycan Respublikasının Qanun layihəsində dövlət büdcəsinin kəsirinin özəlləşdirmədən daxilolmalar, xarici qrantlar və digər mənbələr hesabına (daxili və xarici borclanma, dövlət büdcəsinin vahid xəzinə hesabının qalığı) maliyyələşdirilməsi nəzərdə tutulub.
Trend-in məlumatına görə, qanun layihəsinə Hesablama Palatasının verdiyi rəydə özəlləşdirmədən daxilolmalar üzrə proqnoz göstəricinin yerinə yetirilməsi ehtimalının aşağı olduğunu qeyd edilib.
Palata 2017-ci ilin 5 ayı üzrə bu mənbə üzrə daxilolmaların cari ilin 200,0 mln. manat məbləğində müvafiq büdcə tapşırığına nisbətən 50,0 mln. manat təşkil etməsi göstərib. Bu isə, yanvar-may aylarında illik proqnozun cəmi 25,0%-ə bərabərdir.
Ümumiyyətlə, Hesablama Palatasının 2016-cı ilin dövlət büdcəsinin icrası ilə bağlı təqdim etdiyi rəydə də özəlləşdirmədən daxilolmaların icra səviyyəsinin aşağı olduğu vurğulanıb. Rəydə 2016-cı il dövlət büdcəsi kəsirinin maliyyələşdirilməsi mənbələrindən biri kimi özəlləşdirmədən daxilolmalar üzrə 100000,0 min manat məbləğində nəzərdə tutulduğu, ilin sonuna isə bu mənbədən dövlət büdcəsinə 68768,4 min manat və ya 3,2 dəfə az olmaqla 31231,6 min manat məbləğində vəsaitin daxil olduğu göstərilib.
Xarici kreditlər üzrə layihələrin maliyyələşdirilməsi ilə bağlı ödənişlərin müqavilə şərtlərinə uyğunlaşdırılması vacibdir. Bu barədə də Hesablama Palatasının rəyində bildirilib.
“Azərbaycan Respublikasının 2017-ci il dövlət büdcəsi haqqında” Azərbaycan Respublikası Qanununda dəyişikliklər edilməsi barədə" qanun layihəsində nəzərdə tutulmuş dəyişikliklərin bir istiqaməti xarici kreditlər üzrə Azərbaycan tərəfinin iştirak payı ilə bağlı olub.
Hesablama Palatasının Qanun layihəsi ilə bağlı təqdim etdiyi rəyə əsasən, 2017-ci ilin dövlət büdcəsinin ilkin təsdiq edilmiş xərclərində 5 layihə üzrə təsdiq edilmiş 144,1 mln. manat məbləğində vəsaitin məbləği 167,0 mln. manat artırılmış, ilkin nəzərdə tutulmamış 1 layihə üzrə 3,0 mln. manat məbləğində vəsaitin ayrılması təklif edilib. Beləliklə, xarici kreditlər üzrə Azərbaycan tərəfinin iştirak payının cəmi 170,0 mln. manat məbləğində artırılması nəzərdə tutulub.
Hesablama Palatası rəyində həyata keçirdiyi nəzarət tədbirləri və təhlillərə əsaslanaraq xarici kreditlər üzrə Azərbaycan tərəfinin iştirak payının maliyyələşdirilməsi ilə bağlı ödənişlərin müqavilə şərtlərinə uyğunlaşdırılmasını məqsədəmüvafiq hesab edib.
Hesablama Palatası qarşıdakı dövrdə neftin qiyməti ilə bağlı gözləntilərini də açıqlayıb. Palatanın "Azərbaycan Respublikasının 2017-ci il dövlət büdcəsi haqqında" qanununda dəyişikliklər edilməsi barədə" qanun layihəsinə verdiyi rəydə bildirilib ki, dövlət büdcəsi və Dövlət Neft Fondunun (ARDNF) əsas parametrləri formalaşdırıldığı təqdirdə neftin dünya bazarlarında qiymətinin 40 dollar nisbətində götürülməsi qərara alınıb.
"Cari ilin ilk 5 ayında neftin qiymətinin 50 dollardan yüksək olmasına baxmayaraq son 1 ayda qiymətlərdə azalma müşahidə edilib. Qarşıdakı dövrdə OPEC-ə üzv ölkələrin razılaşmasına baxmayaraq artan geosiyasi gərginlik, ABŞ-ın neft ehtiyatlarının bir hissəsinin satışa çıxarılması ehtimalı, ABŞ-ın Federal Ehtiyatlar Sisteminin cari ildə uçot dərəcəsini iki dəfə artırması, Səudiyyə Ərəbistanı və İraqın hasilatı artırması və s. bu kimi faktorlar ilin sonuna qədər neft qiymətlərinə qarşı ciddi təhdidin olmasını və nəticədə qarşıdakı dövrdə neftin qiymətlərinin dəyişmə ehtimalını şərtləndirə bilər", - deyə sənəddə vurğulanıb.
