Tahir Mirkişili: "Valyutadəyişmə məntəqələrinin yenidən açılması səbəblərindən biri ölkədə beynəlxalq səviyyəli tədbirlərin, idman yarışlarının keçirilməsidir"
Natiq Cəfərli: "Qanuna edilən dəyişikliklər qapadılmış valyutadəyişmə məntəqələrinin yenidən fəaliyyətinə hesablanıb"
Azərbaycanda fiziki və hüquqi şəxslərə valyutadəyişmə məntəqələri açmağa icazə verilməsi təklif olunur. Bununla bağlı "Valyuta tənzimi haqqında" Qanuna müvafiq dəyişikliklər parlamentə təqdim edilib.
2016-cı ilin yanvarından bəri valyutadəyişmə məntəqələri yalnız banklar və poçt şöbələri nəzdində fəaliyyət göstərə bilər. Dəyişikliklərin qəbul olunacağı təqdirdə bu məntəqələri təkcə Azərbaycan rezidentləri yox, həm də xarici şirkətlər ölkədəki filiallarında aça bilər.
Valyutadəyişmə məntəqələrinin yenidən açılmasına münasibət bildirən Milli Məclisin İqtisadi siyasət, sənaye və sahibkarlıq komitəsinin üzvü, millət vəkili Tahir Mirkişilinin sözlərinə görə, valyutadəyişmə məntəqələrinin əvvəllər spekulyativ fəaliyyət göstərməsi ölkədə valyuta kursunun qalxmasına səbəb olmuşdu: "Onların müəyyən qanunazidd fəaliyyəti aşkar olundu. Bu kimi hallar ölkənin makroiqtisadi sabitliyinə mənfi təsir etdi. Ancaq indi ölkədə maliyyə sabitliyi bərpa olunub. Hazırda qarşıda duran əsas məqsəd iqtisadi aktivliyin artırılmasıdır.
Eyni zamanda, məntəqələrin yenidən açılması səbəblərindən biri də ölkədə beynəlxalq səviyyəli tədbirlərin, idman yarışlarının keçirilməsidir. Bu tədbirlər nəticəsində ölkəyə böyük turist axını gözlənir. Onların valyuta dəyişməsi üçün daha çevik şəraitin təşkil olunmasına ehtiyac var".
T.Mirkişili bildirdi ki, qanuna edilən yeni dəyişikliklərə əsasən, bu fəaliyyət sahəsində sərt nəzarət tədbirləri həyata keçiriləcək: "Belə ki, əvvəlki spekulyativ fəaliyyətə bir daha yol verilməməsi üçün, qanunvericilik sərtləşdirilir. Lisenziyalaşdırma şərtlərinə görə daha sağlam hüquqi şəxslər seçiləcək. Bundan əlavə, fəaliyyət zamanı kurs arasında fərqin çox olmaması da qanunla tənzimlənəcək".
İqtisadçı-ekspert Natiq Cəfərli isə qeyd etdi ki, "Valyuta tənzimi haqqında" Qanunda dəyişikliklər edilməsi ilə Azərbaycanda fiziki şəxslərə valyutadəyişmə məntəqəsi yaratmaq səlahiyyəti verilir. Onun sözlərinə görə, dəqiq müddəalar qanun qəbul olunduqdan sonra məlum olacaq: "Təklif edilən dəyişiklik valyutadəyişmə məntəqələrinin yenidən açılması anlamına gəlir. Valyutadəyişmə məntəqəsinin fəaliyyət göstərməsi üçün xüsusi tələblər var: seyf qapı, seyflər, siqnalizasiya və s. Fiziki şəxslər 500 manat lisenziya haqqı ödəməklə valyutadəyişmə məntəqəsi işlədə biləcək. Yəni fiziki şəxslər banka bağlı olmadan birbaşa fəaliyyət göstərə biləcək".
Ekspertin fikrincə, qanuna edilən dəyişikliklər qapadılmış valyutadəyişmə məntəqələrinin yenidən fəaliyyətinə hesablanıb: "Əslində, doğru olan da budur. Valyutadəyişmə məntəqələrinin bağlanması heç bir iqtisadi effekt vermədi, əksinə, bazarda panikanı artırdı, "qara bazar"ın yaranmasına təkan verdi. Eyni zamanda, vətəndaşlara, turistlərə axşam saat 6-dan sonra valyuta dəyişməkdə çətinlik yaratdı. Çox güman ki, əvvəlki valyutadəyişmə məntəqələrinin bir çoxu açılacaq. Çünki onlar tələb edilən kriteriyalara uyğundur, seyflə, seyf qapı ilə, gülləkeçirməz şüşə ilə təmin olunmuşdu".
Günel CƏLİLOVA
