Ülviyyə Mirqasımova: "Festivalın əsas məqsədi Rusiya, İran, Gürcüstan, Ukrayna və ərəb ölkələrindən potensial turistlərin cəlb edilməsidir"
Paytaxt Bakı möhtəşəm bir şoppinq festivalına ev sahibliyi edir. Belə bir festival Bakıda ilk dəfədir keçirilir. Festival aprelin 10-da başlayıb və mayın 10-dək davam edəcək. Məlumat üçün bildirək ki, ilk Bakı Şoppinq Festivalında Mədəniyyət və Turizm Nazirliyi ilə yanaşı, digər aidiyyəti qurumlar da iştirak edir.
Festivalın keçirilməsində məqsəd xaricdən turist axınının təşviq edilməsi, eyni zamanda, daxili turizmin inkişafıdır. Burada əcnəbilərlə yanaşı, Azərbaycan vətəndaşları da "Tax free" (əlavə dəyər vergisinin qaytarılması) sistemindən istifadə edə bilir. Belə ki, 100 manat və daha çox alış-veriş edən hər bir əcnəbi və ya Azərbaycan vətəndaşı bu sistemdən yararlanmaq imkanına malikdir.
Şoppinq Festivalı iri ticarət və əyləncə mərkəzlərində keçirilir. İştirakçı kimi qeydiyyatdan keçən mağazalar "Tax free" nişanı ilə fərqlənir.
Festivala marağın nə səviyyədə olmasını öyrənmək məqsədilə Azərbaycan Konqreslər Bürosu idarə heyətinin sədri Ülviyyə Mirqasımovaya müraciət etdik.
- Artıq neçə gündür ki, Şoppinq Festivalı başlayıb. Bu festivala maraq necədir?
- Festivala qoşulan mağazaların sayı günbəgün artır və alıcılar məlumatlandıqca, festivalın faydasını gördükcə, mağazalara daha çox gəlirlər. Bütün bunlar göstərir ki, həm sahibkarlarda, həm də alıcılarda festivala böyük maraq var.
- Maraqlıdır, festivala xarici vətəndaşlar daha çox maraq göstərir, yoxsa yerli vətəndaşlar?
- Nəzərə alsaq ki, Bakı Şoppinq Festivalı, dünyada ilk dəfə olaraq, yerli əhaliyə ƏDV qaytarılmasını təklif edir, buna görə onların festivala marağı gözlənildiyindən də yüksəkdir. Hazırda turistlər də gəlməkdə davam edir. Turistlərin alış-verişdəki payı günbəgün artmaqdadır.
- Şoppinq Festivalı paytaxtın iri ticarət mərkəzlərində keçirilir. Daha çox hansı ticarət mərkəzlərinə axın müşahidə olunur?
- Mağazalardan aldığımız məlumata və şəxsi müşahidəmizə əsasən deyə bilərik ki, festival keçirilən bütün ticarət mərkəzlərinə maraq yüksəkdir. Həmçinin ticarət mərkəzlərindən kənar ərazilərdəki obyektlərə də insan axını artmaqdadır.
- Ülviyyə xanım, festivalda daha çox hansı ölkənin vətəndaşları aktivdir?
- Alıcılar arasında müxtəlif ölkələrdən insanları görmək mümkündür. Festivalın əsas məqsədi Rusiya, İran, Gürcüstan, Ukrayna və ərəb ölkələrindən potensial turistlərin cəlb edilməsidir. Festival adıçəkilən ölkələrdən daha çox turistin ölkəmizə gəlməsinə səbəb olacaq.
- Festivala geyim, parfümeriya və digər dükanlar da qoşulub. Alıcılar daha çox hansı kateqoriyadan olan məhsulları almaqda həvəslidir?
- Bakı Şoppinq Festivalında iştirak edən hər bir mağazada alıcılar fəal alış-veriş edir. Nəzərə almaq lazımdır ki, festivalda sərfəli endirimlər və ƏDV-nin qaytarılması imkanları alıcıları ruhlandırır. Belə olan halda, alıcılar festivalda iştirak edən dükanlardan istədiklərini həvəslə alır. Alıcılar geyim, ətriyyat, ayaqqabı, məişət əşyaları və texnika mağazalarındakı endirimlərdən faydalanır.
- Festivala qoşulan brend dükanların sayı günü-gündən artır. Yaxın günlərdə digər brend dükanların da şoppinq festivala qoşulmaq ehtimalı varmı?
- Qeyd etdiyiniz kimi, sahibkarların festivala marağı yüksəkdir. Biz hər gün yeni obyektlərlə danışıqlar aparır və iştirakçı mağazaların sayını artırırıq. Media və alıcılarımız yeni qoşulan obyektləri rəsmi saytımızın iştirakçılar bölümünün bizim mağazalar () hissəsindən izləyə bilər.
Günel CƏLİLOVA
