İlham Şaban: "Cari il üçün neftin orta ixrac qiyməti 50 dollardan yuxarı proqnoz edilir"
Azərbaycan Dövlət Neft Fondunun (ARDNF) bu ilin sonuna aktivlərinin həcminin ilin əvvəlindəki səviyyədə qalması proqnozlaşdırılır. Bunu Fondun icraçı direktoru Şahmar Mövsümov keçirdiyi mətbuat konfransında bildirib: "Hesablamalarımıza görə, neftin qiymətinin hazırkı vəziyyəti, xərclərin səviyyəsi onu deməyə əsas verir ki, ilin sonuna Fondun aktivləri ilin əvvəli ilə eyni səviyyədə qalacaq".
Ş.Mövsümovun açıqlamasına görə, Fondun bu ilin I rübü üzrə büdcə gəlirləri 3 mlrd. 272,5 mln. manat, büdcə xərcləri isə 3 mlrd. 847,5 mln. manat təşkil edib.
Onun sözlərinə görə, hesabat dövründə ARDNF-in neft və qaz sazişlərinin həyata keçirilməsi ilə bağlı gəlirləri 2 mlrd. 899,1 mln. manat, o cümlədən mənfəət neftinin və qazın satışından 2 mlrd. 894,4 mln. manat, bonus ödənişləri 0,1 mln. manat, tranzit gəlirləri 4,6 mln. manat təşkil edib.
Bu il aprelin 1-nə Fondun vəsaitinin idarə olunmasından əldə edilən gəlirlər 373,4 mln. manata bərabər olub. Hesabat dövründə ARDNF-in 2017-ci il büdcəsinin icrası çərçivəsində 1 mlrd. 525 mln. manat vəsait dövlət büdcəsinə transfer edilib: "Makroiqtisadi sabitliyin təmin edilməsi məqsədilə 2 mlrd. 279 mln. manat Azərbaycan Mərkəzi Bankına transfer edilib".
Məlumat üçün qeyd edək ki, 2017-ci il aprelin 1-nə Fondun aktivləri 2017-ci ilin əvvəlinə (33 mlrd. 147 mln. dollar) nisbətən 0,18 faiz artaraq 33 mlrd. 207,2 mln. dollara bərabər olub.
Bütün bu deyilənlərin fonunda, bu ilin sonuna Fondun aktivlərinin həcminin ilin əvvəlindəki səviyyədə qalması nə dərəcədə mümkündür?
Sözügedən məsələni dəyərləndirən Neft Araşdırmaları Mərkəzinin rəhbəri İlham Şabanın fikrincə, prinsipcə, bu mümkündür. Onun fikrincə, neftin hazırkı qiyməti ilə bu ilin büdcəsində defisit yaranmayacaq: "Çünki büdcədə neftin qiyməti 40 dollar götürülüb. Cari il üçün neftin orta ixrac qiyməti 50 dollardan yuxarı proqnoz edilir. Bu fərq yaranacaq defisiti örtməyə kifayət edir. Lakin pul kütləsinin azalmasını da nəzərə almaq lazımdır. Bu ilin birinci rübündə ötən ilin birinci rübü ilə müqayisədə pul kütləsi 7,5 faiz azalıb. Azərbaycanda pul kütləsinin maksimum həddi 2014-cü ilin iyul ayında olub - 11,44 milyard manat. O baxımdan aktivlərin səviyyəsinin stabil qalacağı gözlənir. Digər tərəfdən, bir sıra beynəlxalq agentliklər dünya bazarında neftin qiymətinin 2019-cu ildə 65 dollar olacağını proqnozlaşdırır. 2017-ci ildə Azərbaycan hökuməti 40 milyon ton neft hasil etməyi proqnozlaşdırır. Bu il neftin orta ixrac qiyməti 66 dollar olsaydı, Azərbaycan iqtisadiyyatı özünü komfortlu hiss edə bilərdi. Bu o deməkdir ki, əməkhaqları 10 faiz artardı".
Vidadi ORDAHALLI
