Vüqar Bayramov: "Azərbaycan bununla bağlı mövcud potensialından tam olaraq istifadə etmir"
Azərbaycan Prezidenti İlham Əliyev qeyri-neft ixracatçılarının Yevlaxda keçirilən respublika müşavirəsində bildirib ki, Azərbaycanda iqtisadi sahədə həyata keçirilmiş məqsədyönlü tədbirlər nəticəsində qeyri-neft sektoru inkişaf edir, ölkənin ixrac potensialı artır:
"Bu ilin göstəriciləri çox sevindiricidir. Mən bu barədə artıq demişəm, bir daha demək istəyirəm ki, bu ilin üç ayının göstəriciləri bizi çox ruhlandırır. Bu bir daha göstərir ki, 2016-cı ildə qəbul etdiyimiz qərarlar və başladığımız islahatlar qısa müddət ərzində öz gözəl nəticələrini verib. Götürdüyümüz bu temp və geniş vüsət almış islahatlar, o cümlədən sahibkarlar tərəfindən bizim siyasətimizə göstərilən praktiki dəstək, - onlar öz işi ilə, öz investisiyaları ilə bunu göstərirlər, - deməyə əsas verir ki, 2017-ci il çox uğurlu il olacaq. Eyni zamanda, biz yeni iqtisadi modelə keçməklə bundan sonra iqtisadiyyatımızı ancaq islahatlar, innovasiyalar, texnologiyalar və qeyri-neft sektoru hesabına inkişaf etdirəcəyik".
İqtisadiyyatın sadalanan 4 istiqamət üzrə inkişaf etdirilməsi nə dərəcədə effektli ola bilər? Məsələyə münasibət bildirən iqtisadçı-ekspert Vüqar Bayramovun sözlərinə görə, belə bir modelə üstünlük verilməsi məqsədəuyğundur: "Nəzərə almaq lazımdır ki, artıq postneft dövrü başlayıb, eyni zamanda neftin dünya bazarındakı qiyməti ilə bağlı proqnozlar fərqlidir. Neqativ proqnozlar da var. Bu baxımdan ölkədə qeyri-neft sektorunun inkişafı prioritetdir. Azərbaycan, birmənalı şəkildə, qeyri-neft sektorunun inkişafı ilə bağlı hədəflərə nail olunması istiqamətində addımlarını genişləndirir. Bu kontekstdə, təbii ki, müşavirə kifayət qədər əhəmiyyətli mövzuya həsr olunub. Ölkə Prezidentinin sədrliyi ilə belə müşavirələrin keçirilməsi Azərbaycanda qeyri-neft ixracının dəstəklənməsi ilə bağlı siyasi iradənin olmasından xəbər verir. Təbii ki, hədəf, birmənalı şəkildə, qeyri-neft ixracının dəstəklənməsinə və ixrac potensialının artırılmasına nail olmaqdan ibarətdir. Sözügedən 4 istiqamət Azərbaycanda neftdən asılılığın aradan qaldırılması, iqtisadi diversifikasiyanın sürətləndirilməsi baxımından vacib hesab olunmalıdır. Gözlənir ki, müşavirədə qaldırılan məsələlərin reallaşdırılması, nəticə etibarilə, Azərbaycanın qeyri-neft iqtisadiyyatının artırılmasına gətirib çıxaracaq. Azərbaycan bununla bağlı mövcud potensialından tam olaraq istifadə etmir. Yalnız kənd təsərrüfatı və qida məhsulları deyil, o cümlədən sənaye məhsullarının da ixrac imkanlarının artırılmasına ehtiyac var".
Vidadi ORDAHALLI
