Azərbaycan Rusiyaya ixrac olunan kənd təsərrüfatı məhsullarının mənşəyinə və keyfiyyətinə cavabdehdir. Trend-in məlumatına görə, bunu jurnalistlərə Dövlət Gömrük Komitəsinin sədri (DGK) Aydın Əliyev deyib.
Meyvə-tərəvəz məhsullarının Azərbaycan ərazisindən Rusiya ərazisinə daşınması məsələsi barədə danışan A.Əliyev qeyd edib ki, Azərbaycana gələn Rusiya nümayəndə heyəti ixrac olunan məhsulların keyfiyyəti barədə əmin ola bilər: “Danışıqlardan sonra Rusiya nümayəndə heyəti müxtəlif təsərrüfatlarla tanış ola bilər. Qonaqlarımız özləri əmin ola bilərlər ki, biz kənd təsərrüfatı məhsullarının mənşəyinə və keyfiyyətinə cavabdehik”.
Azərbaycan məhsullarının Rusiya sərhədində saxlanılmasına gəlincə, DGK sədri deyib ki, hazırda bütün problemlər həll olunub: "Sərhəddə bir neçə avtomobil saxlanmışdı. Lakin laboratoriyada müvafiq yoxlamalar nəticəsində məhsulların Azərbaycana məxsus olduğu sübut edildikdən sonra həmin avtomobillər Rusiyaya buraxılıb".
Dövlət Gömrük Komitəsinin sədri bildirib ki, 2017-ci ilin birinci rübündə Azərbaycanın kənd təsərrüfatı məhsullarının ixracı 73 faiz artıb. Onun sözlərinə görə, kənd təsərrüfatı məhsulları Rusiyaya, eləcə də Ukrayna və Qazaxıstan kimi ölkələrə ixrac olunub: "Eyni zamanda, birinci rübdə kənd təsərrüfatı məhsullarının idxalında azalma müşahidə edilib. Ötən ilin analoji dövrü ilə müqayisədə Azərbaycana meyvə-tərəvəz idxalı 17 faiz azalıb. Bunun səbəbi kənd təsərrüfatı məhsullarına tətbiq olunan gömrük rüsumlarıdır”.
