Artıq Azərbaycan turizm ölkəsinə çevrilmək üzrədir. Turizmi və səyahəti sevənlər ilin istənilən fəslində ölkəmizə təşrif buyurur. Bunu müşahidə etmək üçün paytaxt küçələrində bir neçə saat gəzmək kifayətdir.
Turizm sahəsinin inkişafı üçün dövlət tərəfindən addımlar atılır. Xatırladaq ki, bu günlərdə Milli Məclisin Əmək və sosial siyasət komitəsinin iclasında "Turizm haqqında" qanun layihəsi müzakirəyə çıxarılıb.
Milli Məclisin Sosial qanunvericilik şöbəsinin əməkdaşı Adil Vəliyev çıxışı zamanı bildirib ki, müzakirəyə təqdim olunan qanun layihəsi ilkin variantdan xeyli fərqlənir: "Qanun layihəsi ixtisar edilərək 88 maddədən 70 maddəyə endirilib. Bu hələ də tam yetkin qanun layihəsi deyil və bir sıra maddələr ixtisar oluna bilər. Yəni bu, son deyil. Qanunda turizm sektorunun stimullaşdırılması məqsədilə bir sıra müddəalar nəzərdə tutulub. Belə ki, turizm sektoruna sərmayə qoyan sərmayədarlara güzəştlərin tətbiqini nəzərdə tutur".
Turizm sektoruna yatırım qoyan investorlara güzəştlərin tətbiq olunması ekspertlər tərəfindən də müsbət dəyərləndirilir. Onların fikrincə, investorlara güzəşt tətbiq olunarsa, bu, turizmin inkişafına və həmin sahədə qiymət dəyişikliyinə səbəb ola bilər.
Turizm sahəsi üzrə ekspert Ruslan Quliyev "Bakı-Xəbər"ə açıqlamasında qeyd etdi ki, Azərbaycanın dünyaya tanıdılması əsas məsələlərdən biridir. Bu, istənilən sahədə çalışanların mənəvi borcudur: "Vaxtilə Azərbaycan haqqında yazarlar və digər sahənin nümayəndələri gözəl ifadələr işlədib. Biz bu prosesi 10 il əvvəl başlatsaydıq, daha gözəl nəticələr əldə edərdik. Ölkə başçısı İlham Əliyevin müvafiq sərəncamları müsbət dəyişikliklərə səbəb olur. Viza sisteminin sadələşdirilməsi, infrastruktur layihələr, brend mehmanxanalar, təhsil və kadr məsələlərində inkişaf müsbət nəticələrə səbəb olub. Ümid edirik ki, Strateji Yol Xəritəsinin təsdiqindən sonrakı dövrdə - 2025-ci ilədək fövqəladə dəyişikliyin şahidi olacağıq. Hədəfimizdə 10 milyon turistin qəbul olunmasıdır. İnfrastrukturu Azərbaycandan zəif olan Gürcüstan 6 milyona imza atırsa, qısa zaman ərzində biz bunun ikiqatını həyata keçirməyə hazırıq. Azərbaycan logistika və nəqliyyat dəhlizləri proyektində uğurlu oyunçu olmaq istəyirsə, bu gün istər hava, istər dəniz, istərsə də dəmir yolu nəqliyyat vasitələrinin imkanlarından daha çox istifadə etməklə nəqliyyat qovşağı imicini möhkəmləndirməlidir. Əsas məsələ turistlərin Azərbaycana gəlməsi deyil. Bəllidir ki, Azərbaycan çox gözəl coğrafi mövqedə yerləşir".
Həmsöhbətimizin sözlərinə görə, son zamanlar turizm sahəsi ilə bağlı çoxlu sayda sərəncamlar imzalanıb. Dünya bazarında rəqabət qabiliyyətimizi artırmaq məqsədilə təqdim etdiyimiz xidmətlərin maya dəyərinin azaldılması ilə bağlı fəaliyyət genişləndirilməlidir. Kiçik və orta sahibkarlığın inkişafına təkan vermək lazımdır. Turizm sahəsində çalışan şirkətlərin, təsisatların qorunması ilə bağlı bir sıra qanun layihələri hazırlanır. Bu, "Turizm haqqında" qanun layihəsində öz əksini tapacaq".
R.Quliyev onu da qeyd etdi ki, nəinki milli sahibkarlar, eyni zamanda xarici investorların ölkəyə girişi üçün dövlət tərəfindən bütün şərtlər təmin edilməlidir: "Əmlak və mənfəət vergisi güzəşti tətbiq olunmalıdır. Xüsusilə bölgələrdə turizm sahəsinə sərmayə yatıran sərmayədarlara differensial vergi tətbiq olunmalıdır".
Günel CƏLİLOVA
