Əli Əlirzayev: "Sahibkar maraqlı olacaq ki, fəaliyyətini genişləndirsin, yeni iş yerləri açsın"
Azərbaycan Prezidenti İlham Əliyev sahibkarların mövcud və ya inşa ediləcək tikinti obyektlərinin elektrik enerjisi ilə təchizatı prosedurunun sadələşdirilməsi haqqında fərman imzalayıb.
Bu fərmanla ölkənin biznes və investisiya mühitinin əlverişliliyini, yerli və xarici investorlar üçün cəlbediciliyini daha da artırmaq, beynəlxalq reytinqlərdə mövqeyini yaxşılaşdırmaq, enerji təchizatı şəbəkələrinə qoşulma prosedurunu və müddətini optimallaşdırmaq, göstərilən xidmətləri daha keyfiyyətli, rahat və innovasiyaların tətbiqi ilə həyata keçirmək, bu sahədə şəffaflığı və istehlakçı məmnunluğunu təmin etmək məqsədilə "Sahibkarların tələb olunan gücü 150 kVt-a qədər (150 kVt da daxil olmaqla mövcud 0,4 kV-luq şəbəkədən) olan mövcud və ya inşa ediləcək tikinti obyektlərinin elektrik enerjisi (gücü) alması üçün texniki şərtlərin, layihə-smeta sənədlərinin hazırlanması və verilməsi, habelə enerji təchizatı şəbəkəsinə qoşulması Qaydası" təsdiq edilir.
Sahibkarların enerji təchizatı şəbəkəsinə qoşulması ilə bağlı işlərin həyata keçirilməsinə nəzarət etmək məqsədilə Texniki Şura yaradılıb.
Prosedurların sadələşdirilməsi imkan verəcək ki, sahibkarlar əlavə vaxt itkisi və xərclərlə üzləşməsin. Xüsusən də xarici sərmayənin cəlb olunması baxımından bunun müsbət əhəmiyyəti var.
Maraqlıdır, bəs ekspertlər buna necə yanaşır? Məsələyə münasibət bildirən iqtisadçı-alim Əli Əlirzayev sözügedən fərmanı müsbət dəyərləndirdi. Onun fikrincə, bu, ölkədə sahibkarlığın inkişafı baxımından düzgün addımdır: "Bu, istər xarici, istərsə də daxili investisiyaların təşviqinə xidmət edən bir addımdır. Prosedurların sadə olduğunu görən xarici investor maraqlı olacaq ki, ölkəyə sərmayə yatırsın. Eyni zamanda bu, əlavə vaxt itkisinin qarşısını alacaq. Bunun müqabilində əldə olunan nəticə dayanıqlı və uzunmüddətli olacaq. Sahibkar maraqlı olacaq ki, fəaliyyətini genişləndirsin, yeni iş yerləri açsın. Nə qədər sahibkarlara yaradılan şərait böyük olsa, bir o qədər ölkədə işgüzar mühit yaranacaq, daxil olan sərmayələrin həcmi artacaq, yeni istehsal və xidmət sahələri yaradılacaq. Bütün bunların hamısı bir-birilə sıx bağlıdır. Maksimum çalışmaq lazımdır ki, ölkədə biznes, sahibkarlıq inkişaf etsin, rəqabət mühiti yaransın. Bunun üçün də prosedurlar sadələşdirilməli, yoxlamalar aradan götürülməli və vergi sistemi optimallaşdırılmalıdır. Ölkənin inkişaf etdirilməsinin başqa yolu yoxdur. Bütün bunların nəticəsində ölkədə məşğulluq problemi həll olunacaq. Hesab edirəm ki, verilən fərman və sərəncamlar buna xidmət edir".
Vidadi ORDAHALLI
