Vüqar Bayramov: "Qida sənayesində çay məhsulunu adıçəkilən ölkənin bazarına çıxarmaq mümkündür"
"Qazaxıstan bazarı bizim üçün böyük maraq doğurur". Bunu aprelin 3-də Bakıda Qazaxıstan prezidenti Nursultan Nazarbayevlə birgə mətbuata bəyanatla çıxışı zamanı Azərbaycan Prezidenti İlham Əliyev deyib.
Dövlət başçısı vurğulayıb ki, Azərbaycan Qazaxıstana fəal sərmayə qoymağa başlayıb və Aktauda logistika mərkəzinin açılışı və həmin şəhərdə energetika-maşınqayırma zavodunun inşası bizim ticari-iqtisadi əməkdaşlığımızın möhkəmlənməsinə yönəldilmiş investisiyalarımızın nümunəsidir: "Qazaxıstan bazarı bizim üçün böyük maraq doğurur. Bir daha demək istəyirəm ki, biz Qazaxıstana ixrac edə biləcəyimiz və oradan idxal edə biləcəyimiz mövqeləri bənd-bənd konkret müzakirə etdik. Həmçinin müasir texnika əldə olunması ilə əlaqədar iri layihələri müzakirə etdik. Biz Qazaxıstandan müasir nəqliyyat vasitələri, teplovozlar, elektrovozlar alırıq. Mən, həmçinin, Nursultan Abişeviçə bütün gəmi növləri, tankerlər, bərələr istehsal edən bizim Bakı gəmiqayırma zavodunun potensialı barədə məlumat verdim. Biz özümüz sifarişlər yerləşdiririk və həmçinin, bu müasir müəssisənin imkanlarından istifadə etməyə Qazaxıstan şirkətlərini də dəvət edirik".
Maraqlıdır, Azərbaycan Qazaxıstana hansı məhsulları ixrac edə bilər? İqtisadçı-ekspert Vüqar Bayramov "Bakı-Xəbər"ə açıqlamasında qeyd etdi ki, Qazaxıstan bazarı Azərbaycan üçün cəlbedicidir: "Qida və kənd təsərrüfatı məhsulları Qazaxıstan bazarına çıxa bilər. Qida sənayesində çay məhsulunu adıçəkilən ölkənin bazarına çıxarmaq mümkündür. Nəzərə almaq lazımdır ki, Qazaxıstanda qida və kənd təsərrüfatı məhsullarına böyük tələb var. Tələbin ödənilməsi üçün Azərbaycan sahibkarları və fermerləri sözügedən ölkənin bazarına çıxış imkanı əldə etməklə öz məhsullarını Qazaxıstana ixrac edə bilər".
Həmsöhbətimizin sözlərinə görə, neft və kimya məhsullarının da adıçəkilən ölkənin bazarına çıxış imkanı mövcuddur. Qazaxıstan bazarı bu kontekstdən cəlbedicidir.
Gələcəkdə yüngül sənaye sahəsinin inkişafı gözlənir: "Bu sahənin məhsulları qonşu ölkələrə ixrac oluna bilər".
Günel CƏLİLOVA
