Rəsul Cahangirli: "Bu sahədə qiymətlər aşağı salınsa, xidmətin keyfiyyəti bir az da artırılsa, gələnlərin sayı bir neçə dəfə artacaq"
Azərbaycana son 2 il ərzində turist axını müşahidə olunur. Ölkəmizə gələn turistlər arasında xüsusilə də ərəb ölkələrindən və İrandan olan turistlərin sayı çoxluq təşkil edir. Bir qayda olaraq, kütləvi turist axını olan ölkələrdə xidmət sektoru daha sürətlə inkişaf edir. Bu da, öz növbəsində, qeyri-neft sektorunun digər sahələrinin inkişafına öz müsbət təsirini göstərir. Məlumata görə, bu ilin mart ayında Azərbaycana gələn turistlərin sayı 29 min nəfərdən çox olub.
Mart ayında İrandan təyyarə ilə Bakıya 12 mindən çox turist gəlib. Bu barədə Azərbaycan Turizm Assosiasiyası idarə heyətinin sədri Nahid Bağırov deyib. Onun sözlərinə görə, ötən il bu rəqəm 4300 olub: "Bu rəqəmlər sırf İrandan təyyarə ilə ölkəmizə gələn iranlı turistlərin sayıdır. Bu statistikada avtobus, öz maşını ilə gələn, öz evlərində qalan, Naxçıvana gedən iranlı turistlərin sayı yoxdur. Onların rəqəmləri isə bir qədər gec açıqlanır. İrandan əvvəl Tehrandan yalnız uçuşlar olurdusa, artıq bu ildən AZAL vasitəsilə Tehran, Təbriz, Şiraz, Məşhəddən birbaşa uçuşlar təşkil olunub və günü-gündən də coğrafiya genişlənir".
N.Bağırov onu da qeyd edib ki, mart ayı ərzində Dubaydan gələnlərin sayı isə 2 dəfə artıb: "Mart ayında Azərbaycana Dubaydan 17 minə yaxın turist gəlib. Ötən il isə Dubaydan gələn turistlərin sayı 8 minə yaxın olub".
Ümumilikdə, Azərbaycana gələn turistlərin sayının artmasını ekspertlər necə dəyərləndirir? Məsələyə münasibət bildirən ekspert Rəsul Cahangirli sözügedən tendensiyanı bir sıra amillərlə əlaqələndirdi və bunun müsbət hal olduğunu bildirdi: "Son illər Azərbaycan iqtisadiyyatının inkişafında turizm sektorunun özünəməxsus payı var. İstər paytaxt Bakıda, istərsə də turizm regionlarında yaradılan infrastruktur ildən-ilə Azərbaycana daha çox turistin gəlməsinə şərait yaradır. Digər tərəfdən, il ərzində Azərbaycanda bir neçə beynəlxalq əhəmiyyətli siyasi, iqtisadi, mədəni və humanitar tədbirlərin keçirilməsi də turistlərin marağının artmasına səbəb olan başlıca amillərdəndir. Heç şübhəsiz ki, həmin turistlərin hər birinin ölkə iqtisadiyyatına faydası böyükdür. Təsadüfi deyil ki, son bir-iki il ərzində ölkə iqtisadiyyatına gələn gəlirlərin həcmində turizm sektorunun xüsusi payı var. Bu istiqamətdə proseslər onu göstərir ki, qeyd etdiyimiz müsbət tendensiya artan xətt üzrə gedəcək. Başqa bir tərəfdən, Azərbaycanda otel və mehmanxana şəbəkələri genişlənməkdədir. Təkcə paytaxtda deyil, eləcə də regionlarda müasir standartlara cavab verən yeni turizm obyektləri, otellər inşa olunur. Bu da, öz növbəsində, xarici turistlərin Azərbaycana marağının artmasına müsbət təsir göstərən amillərdəndir. Turizm sektorunun inkişafı ölkə əhalisinin məşğulluq səviyyəsinə müsbət təsir göstərir. Yeni inşa edilmiş otel və mehmanxana şəbəkəsində yüzlərlə yeni iş yerlərinin açılması ümumilikdə ölkədə işsizlik səviyyəsinin azalmasına gətirib çıxarır. Azərbaycanda qeyri-neft sektorunun inkişafının başlıca məqsəd olduğunu nəzərə alsaq, turizmin daha da inkişaf etdirilməsi vacib əhəmiyyət kəsb edir. Fikrimcə, bu sahədə qiymətlər aşağı salınsa, xidmətin keyfiyyəti bir az da artırılsa, gələn turistlərin sayı bir neçə dəfə artacaq. Bu da milyonlarla vəsaitin ölkəyə daxil olması deməkdir".
Vidadi ORDAHALLI
