İlqar Hüseynli: "Kənd təsərrüfatında emal sənayesinin qurulması iki ölkə arasında ticarət dövriyyəsinin artmasına ciddi təkan verəcək"
Qazaxıstan prezidenti Nursultan Nazarbayev Bakıya səfəri zamanı iki ölkə arasında bir sıra sazişlər imzalanıb. Nazarbayev bildirib ki, bizim qarşılıqlı münasibətlərimizin əsas məsələsi ticarətdir.
Ticarəti genişləndirmək əsasında bütün digər münasibətləri inkişaf etdirmək lazımdır: "Ticarət bazisdir, təməldir. Biz ticari münasibətlərdə əmtəə dövriyyəsinin artırılmasının vacibliyini xüsusilə qeyd etdik. Demək olmaz ki, 140 milyon dollar potensialımıza cavab vermir, amma bizim imkanlarımızı göstərmir. Buna görə də bu sahədə birinci yerə Xəzər dənizi ilə nəqliyyat-logistika əməkdaşlığı çıxır".
O da məlum olub ki, Qazaxıstan yeni İpək Yoluna cəlb olunub - Çin Xalq Respublikasının "bir kəmər-bir yol" təşəbbüsü əsasında Çinin sərhədindən Xəzər dənizinə qədər ümumi uzunluğu 2 min kilometrədək olan dəmir yolu inşa edilib. Qərbi Çin-Qərbi Avropa avtobanının 2700 kilometrlik hissəsi inşa olunub. İndi söhbət Çindən konteynerlərin gətirilməsindən gedir. Sözügedən konteynerlər artıq Qərbi Avropaya, Böyük Britaniyaya 14 sutka ərzində çatdırılır. Bundan əvvəl isə dənizlər və okeanlar vasitəsilə 40-45 günə çatdırılırdı. Artıq yüklərin Avropaya Qafqaz - Bakı, Xəzər dənizi vasitəsilə gətirilməsi planlaşdırılır. Burada isə böyük potensial mövcuddur. Hesablamalar göstərir ki, daşımaların həcmi 6-7 milyard dollarlarla ölçüləcək. Onların böyük hissəsi Bakıdan keçəcək.
Ümumilikdə, postneft iqtisadiyyatı dönəmində iki ölkənin iqtisadi əlaqələrinin genişləndirilməsində hansı perspektivlər var?
Məsələyə münasibət bildirən ekspert İlqar Hüseynlinin sözlərinə görə, iki ölkə arasında nəqliyyat və kənd təsərrüfatı sahəsində iqtisadi əlaqələrin inkişaf perspektivləri daha böyükdür: "Nəqliyyat sektorunda Qazaxıstan və Azərbaycan arasında çox ciddi iqtisadi əlaqələrin qurulması imkanları var. Yükdaşımaların dövriyyəsinin artırılması hər iki dövlətə böyük fayda verə bilər. Ona görə ki, hər iki ölkə Xəzərin sahillərində yerləşir. Ən çox isə kənd təsərrüfatı sahəsində inkişaf perspektivləri var. Qazaxıstan bol taxıl məhsulları istehsal edən ölkədir. O cümlədən, iki ölkə arasında maldarlıqla bağlı iqtisadi əlaqələrin genişləndirilməsinə ehtiyac var. Hesab edirəm ki, kənd təsərrüfatında emal sənayesinin qurulması iki ölkə arasında ticarət dövriyyəsinin artmasına ciddi təkan verəcək".
Vidadi ORDAHALLI
