İlqar Hüseynli: "Bu qayda illər öncə tətbiq olunmalı idi"
Azərbaycanda dövlət büdcəsinin vəsaitlərindən təyinatı üzrə istifadə etməməyə görə cəzanın sərtləşdirilməsi və satınalma prosedurları keçirilmədən dövlət vəsaitləri ilə bağlı hər hansı prosesi həyata keçirmək cinayət məsuliyyəti yaradacaq.
Cinayət Məcəlləsinin hazırkı 308-1-ci (Dövlət büdcəsinin, məqsədli büdcə fondlarının və ya büdcədənkənar dövlət fondlarının vəsaitindən təyinatı üzrə istifadə etməmə) maddəsinə əsasən, dövlət büdcəsinin, məqsədli büdcə fondlarının və ya büdcədənkənar dövlət fondlarının vəsaitindən təyinatı üzrə istifadə etməmə, bu əməllər xeyli miqdarda törədildikdə 8 min manatdan 10 min manatadək miqdarda cərimə edilməklə, 3 ilədək müddətə müəyyən vəzifə tutma və ya müəyyən fəaliyyətlə məşğul olma hüququndan məhrum etmə, yaxud 3 ilədək müddətə müəyyən vəzifə tutma və ya müəyyən fəaliyyətlə məşğul olma hüququndan məhrum edilməklə, 3 ilədək müddətə azadlıqdan məhrum etmə ilə cəzalandırılır. Dəyişiklik layihəsində cəzanın cərimə hissəsinin 9 min manatdan 13 min manatadək artırılması təklif edilir.
Qeyd edək ki, layihə Milli Məclisin plenar iclasına tövsiyə olunub.
Məsələ ilə bağlı fikir bildirən sosial sahə üzrə ekspert İlqar Hüseynli "Bakı-Xəbər"ə açıqlamasında qeyd etdi ki,
Azərbaycanda dövlət büdcəsinin vəsaitlərindən təyinatı üzrə istifadə etməməyə görə cəzanın sərtləşdirilməsi prosesi yubanıb: "Bu qayda illər öncə tətbiq olunmalı idi. Valyuta ehtiyatının daha çox ölkəyə daxil olduğu dönəmlərdə qayda sərtləşdirilməli idi. Bəllidir ki, Azərbaycanda kifayət qədər büdcədən maliyyələşən təşkilat var ki, onlar dövlət vəsaitlərini səmərəsiz şəkildə xərclədilər. Həmin təşkilatlar korrupsiya halına yol verdilər. Məlum məsələ ilə bağlı məhkəmə prosesi yaşandı, dövlət büdcəsi vəsaitlərindən təyinatı üzrə istifadə etməyənlər qanun qarşısında cavab verdilər".
Həmsöhbətimizin sözlərinə görə, məlum məsələ ilə bağlı cəzanın sərtləşdirilməsi təqdirəlayiqdir: "Layihə Milli Məclisdə qəbul olunarsa, bunun yalnız müsbət nəticəsi olar".
Günel CƏLİLOVA
