Tahir Mirkişili: "Qeyri-neft sektorunun daha da inkişaf etdirilməsi, ixracın neftdən asılılığının azaldılması, istehsal olunan məhsulların ixrac edilməsi üçün müxtəlif təşviq mexanizmləri tətbiq olunmağa başlanıb"
Son illər Azərbaycanda sosial-iqtisadi inkişaf sahəsində reallaşdırılan layihələr ölkəmizin tərəqqisi yolunda mühüm bir məsələ kimi qarşıya qoyulub. Azərbaycan iqtisadiyyatı öz inkişafını, rəqabət qabiliyyətliliyini yüksəltmək, təhlükəsizliyini təmin etmək imkanına malikdir. Prezident İlham Əliyevin həm ixracın təşviqi, həm də sahibkarlığın, ən əsası, yerli istehsalın inkişafı ilə bağlı bir çox istiqamətlərdə imzaladığı fərman və sərəncamlar ölkədə qeyri-neft sektorunu daim diqqət mərkəzində saxlamağa xidmət edir.
Prezident İlham Əliyev Saatlıda pambıqçılığın inkişafı məsələlərinə dair respublika müşavirəsində çıxışı zamanı deyib ki, bu ilin ilk iki ayında qeyri-neft sənayemiz 5 faiz, kənd təsərrüfatı isə 3 faizdən çox artıb: "Bu, iqtisadiyyatın real sektorunun - qeyri-neft sənayesinin və kənd təsərrüfatının inkişafının göstəriciləridir. Neftin qiyməti qalxarsa, əlbəttə ki, göstərici də qalxacaq. Neftin hasilatı qalxarsa, göstərici də qalxacaq, düşərsə, düşəcək. Ona görə bu, göstərici deyil. Bizim üçün əsas göstərici qeyri-neft sektorunun və kənd təsərrüfatının göstəriciləridir".
Qeyd olunan faktlar onu deməyə əsas verir ki, ölkədə bu il görüləcək işlər dinamikanı daha da gücləndirəcək. Azərbaycanda qeyri-neft sektorunun inkişafı istiqamətində ciddi iqtisadi islahatlar aparılır. Eləcə də ixracı stimullaşdırmaq, idxaldan asılılığı azaltmaq istiqamətində ardıcıl işlər həyata keçirilir. Kənd təsərrüfatının strateji məhsulu olan pambığın istehsalı da artırılmaqdadır.
İqtisadçı-eskpert Tahir Mirkişilinin fikrincə, qeyri-neft sektorunun daha da inkişaf etdirilməsi, ixracın neftdən asılılığının azaldılması, istehsal olunan məhsulların ixrac edilməsi üçün müxtəlif təşviq mexanizmləri tətbiq olunmağa başlanıb: "Kənd təsərrüfatı istehsalçılarının vergidən azad edilməsi, texnologiya idxal edən və istehsal ilə məşğul olan sahibkarların vergi və gömrük rüsumlarından 50 % azad olunması ümumi işin xeyrinədir. Həmçinin, kənd təsərrüfatı istehsalçılarına 70 % güzəştlə gübrənin, 40 % güzəştlə maşın və texnikanın verilməsini buna misal göstərmək olar. Sahibkarlara güzəştli kreditlərin ayrılması, dövlət orqanlarının öz ehtiyacları üçün milli ərzaq məhsulu alış sisteminin yaradılması, vergi borclarının bağışlanması, sahibkarlıq fəaliyyətində bütün növ yoxlamaların dayandırılması, ixracın təşviqi mexanizmlərinin yaradılması, xarici ölkə səfirliklərində ticarət nümayəndəliklərinin təşkil edilməsi və s. kimi çoxsaylı tədbirləri nümunə kimi söyləmək olar. Prezidentin sərəncamı ilə təsdiq olunmuş "Milli iqtisadiyyat və iqtisadiyyatın əsas sektorları üzrə strateji yol xəritəsinin başlıca istiqamətləri"ndə iqtisadiyyatın qısa, orta və uzun müddətdə dayanıqlı inkişafını təmin edəcək tədbirlər toplusu öz əksini tapıb. Qeyd etmək istərdim ki, görülən tədbirlər nəticəsində artıq 2017-ci ildən başlayaraq Azərbaycanda ÜDM-in sabit artımı proqnozlaşdırılır. Qeyri-neft sektorunun ÜDM-dəki xüsusi çəkisi artıq 70 faizə çatıb".
Vidadi ORDAHALLI
