Günel Fərhadqızı: "Təbii ki, bütün bu faktorlar regionlarda mədəni inqilabın baş verdiyini səciyyələndirir"
Prezident İlham Əliyev Saatlıda pambıqçılığın inkişafı məsələlərinə dair respublika müşavirəsində çıxışı zamanı deyib ki, vaxtilə qəbul olunmuş regionların sosial-iqtisadi inkişafı dövlət proqramları uğurla icra edilir və ölkəmizdə yeni reallıqlar yaradıb:
"Bizim əsas vəzifəmiz ondan ibarət idi ki, - bu gün də, əlbəttə, bu vəzifə qarşımızda durur, - bütün infrastruktur layihələri icra edilsin, müasir infrastruktur yaradılsın, elektrik enerjisi, qazlaşdırma, içməli su, meliorasiya problemləri həll olunsun, kənd yolları, magistral yollar tikilsin və bu, özlüyündə sürətli iqtisadi və sosial inkişafa təkan verəcək. Belə də oldu. Nəzərə alsaq ki, regionların sosial-iqtisadi inkişafına dair artıq bir neçə dövlət proqramı icra edilib, görərik ki, bu proqramların çox böyük əhəmiyyəti var. İnfrastruktur layihələri icra olunandan sonra biznes üçün daha da yaxşı şərait yaradıldı".
Prezident əlavə edib ki, Azərbaycan dövləti bu istiqamətdə ardıcıl siyasət aparır, sahibkarlığın inkişafı, biznes mühitinin yaxşılaşdırılması, yeni ixrac bazarlarının araşdırılması və o bazarlara çıxmağımız ölkəmizin hərtərəfli inkişafına gətirib çıxarıb: "Biz fəaliyyətimizi gələcəkdə də uğurla davam etdirəcəyik. Qeyri-neft sektorunun inkişafı prioritet sahədir, xüsusilə indiki şəraitdə ki, neftin qiyməti dünya bazarlarında kəskin şəkildə aşağı düşüb. Biz indi qeyri-neft sektorunun inkişafına həm daha çox fikir verəcəyik, həm də ki, daha da fəal iş aparılacaqdır".
Bütün sadalananları Azərbaycan regionlarının mədəni inqilabı kimi xarakterizə etmək olarmı?
İqtisadçı Günel Fərhadqızı qəzetimizə bildirdi ki, rəqəmlərə müraciət etsək, belə bir inkişafın getdiyini aydın görərik: "Biz iqtisadçı kimi bunu bilirik. Regionlarımızda gedən inkişafı görmək üçün yalnız rəqəmlərə baxmağa ehtiyac yoxdur. Bunu vizual olaraq da sezmək mümkündür. Etiraf edək ki, yaşadığımız sovet dönəmindəki və müstəqilliyin ilk illərindəki regionlarımızın vəziyyəti indiki ilə müqayisəolunmazdır. Artıq bu inkişaf o səviyyəyə çatıb ki, kənd və şəhər anlayışı arasındakı kəskin təzad minimuma enib. Regionların inkişafı ilə bağlı qəbul edilən konsepsiyaya uyğun olaraq, demək olar ki, bütün rayonların yolları yenilənib. Hətta ən ucqar dağ kəndlərində belə internet və təbii qaz var. Dünyadan məhdud xəbəri olan kəndçi indi qlobal şəbəkəyə çıxış əldə etdiyi üçün, hətta ən uzaqda olan istənilən şəxslə əlaqə saxlaya bilir. Təbii ki, bütün bunlar insanların mədəni səviyyəsi və dünyagörüşünə də müsbət mənada təsir edir. Biz dünyanın çox yerində müşahidələr aparırıq. Tam səmimi deyə bilərəm ki, son illər ərzində regionlarımızda gedən inkişaf müasir dövlətlərlə müqayisə oluna bilər. Təbii ki, bütün bu faktorlar regionlarda mədəni inqilabın baş verdiyini səciyyələndirir.
Mən ən böyük diqqəti regionlarımızda yaradılan səhiyyə ocaqlarına yönəltmək istəyirəm. Orada olan şəraiti, tibbi aparatları görən əcnəbilər belə təəccüblənir. Ən müasir standartlara cavab verir. Bu da inqilabın bir növüdür. Ancaq hesab edirəm ki, həmin tibb ocaqlarında işləmək üçün ixtisaslı kadr çatışmazlığı nəzərə çarpır. Yəqin ki, yaxın zamanlarda bu da öz həllini tapacaq".
Məhəmmədəli QƏRİBLİ
