Musa Quliyev: "Bu kreditlər hesabına yeni müəssisələr yaradılır, iş yerləri açılır"
"Biz yeni iş yerləri yaratmalıyıq. Çünki biz işsizliyi daim aşağı səviyyədə saxlamalıyıq. Bu gün dünya miqyasında işsizliklə mübarizədə Azərbaycan nümunəvi ölkə kimi göstərilir. Çünki bizdə işsizlik çox aşağı səviyyədədir və aşağı səviyyədə qalmalıdır". Bunu Saatlıda keçirilən müşavirədə Azərbaycan Prezidenti İlham Əliyev deyib.
Prezident bildirib ki, bəzi qonşu ölkələrdə işsizlik artıq böhran həddinə çatır, eyni zamanda, orada demoqrafik böhran yaşanır: "Bizdə isə əhali artır. Əhali artdıqca, biz yeni iş yerləri haqqında düşünməliyik. Əhalinin artımı çox müsbət göstəricidir və müsbət prosesdir. Azərbaycan əhalisi on milyona yaxınlaşır. Bu, yaxın gələcəkdə tarixi nailiyyət olacaq. Ancaq, eyni zamanda, bu bizim qarşımızda yeni vəzifələr qoyur. Biz iş yerlərinin yaradılması ilə daim məşğul olmalıyıq ki, işsizlik aşağı səviyyədə olsun. Ona görə məşğulluq üçün pambıqçılığın çox böyük xeyri var".
Dövlət başçısı qeyd edib ki, ilin əvvəlindən təkcə ictimai işlərə 40 mindən çox vətəndaş cəlb edilib, 40 mindən çox yeni iş yeri ancaq dövlət sektorunda yaradılıb: "Dövlət şirkətlərində, dövlət qurumlarında, yerli icra orqanlarında 40 mindən çox vətəndaş artıq işlə təmin edilib. Bu, təmir-tikinti işləridir, bu, yaşıllıqlara qulluq etmək üçün nəzərdə tutulan iş yerləridir".
Ümumilikdə, Azərbaycanda işsizliklə mübarizə modeli necə xarakterizə edilə bilər?
Məsələyə münasibət bildirən millət vəkili Musa Quliyevin fikrincə, ölkədə kiçik və orta sahibkarlığa göstərilən dəstək əhalinin məşğulluğunun artırılması, yeni iş yerlərinin açılmasını təmin edir: "Qeyri-neft sektoru daha da inkişaf etdirilməlidir. Qeyri-neft sektorunun inkişafı, eyni zamanda, sosial məsələlərin həllini sürətləndirir, əhalinin sosial vəziyyətini yaxşılaşdırır. Əsas iş yerlərini də qeyri-neft sektorunda axtarmalıyıq. Əhalinin məşğulluqla təminatında prioritet istiqamət qeyri-neft sektoru olmalıdır. Ölkədə sahibkarlığın inkişafına kifayət qədər dəstək göstərilir. Sahibkarlığa Kömək Milli Fondunun xətti ilə sahibkarlara güzəştli kreditlər verilir. Bu kreditlər hesabına yeni müəssisələr yaradılır, iş yerləri açılır. Bu fəaliyyətlərin nəticəsidir ki, 2017-ci ilin ilk iki ayında qeyri-neft sənayesi 5 faiz, kənd təsərrüfatı isə 3 faizdən çox artıb. Qeyri-neft sektoru məhsullarının ixracı da vacib məsələlərdən biridir. Azərbaycanın bir çox ölkələrlə ticarət dövriyyəsi var. Əlbəttə, qeyri-neft sektoru məhsullarının həmin ölkələrə ixracının artırılması həm bu sahənin inkişafı, həm də ölkəmizə valyuta axınının artırılması baxımından mühüm əhəmiyyətə malikdir. Bunun üçün dövlət sahibkarlara hər cür şərait yaradıb".
Vidadi ORDAHALLI
