Zakir Əhmədov: "Belə olan halda, əlbəttə ki, bank rəhbərlərinin əmlakı müsadirə olunaraq satılmalıdır"
Müflis olan bankların sahiblərinin mülkləri müsadirə ediləcək. Bunu Maliyyə Bazarlarına Nəzarət Palatasının sədri Rüfət Aslanlı bildirib. O bununla bağlı bir sıra məqamlara toxunub.
R.Aslanlının sözlərinə görə, qanunvericiliyə təklif olunan dəyişikliklərə əsasən, bankın problemlərinin yaranmasında inzibatçılar və səhmdarların məsuliyyəti olacağı təqdirdə onlar əmlakları ilə dəymiş zərərin ödənilməsi üçün cavabdeh olacaq: "Biz Azərbaycan qanunvericiliyinə ilk dəfə bu təcrübəni təklif edirik. Dünyada bu təcrübə çox geniş tətbiq olunur. Bankın rəhbərlərinin cəmiyyətdən cəlb olunmuş vəsaitlər hesabına məsuliyyətsiz hərəkətləri nəticəsində bu vəsaitlər itir, bəzi hallarda hətta bilərəkdən fırıldaqçılığa da gedirlər, bank müflis olur. Dövlət də hazırda bu halda Əmanətlərin Sığortalanması Fondu vasitəsilə əhalinin əmanətlərini qaytarır, ancaq nə səhmdarlar, nə də bankın menecmenti məsuliyyət daşımır. Bu doğru deyil. Qanun layihələrində müəyyən edilib ki, belə olan halda, məhz şəxsi, o cümlədən maddi məsuliyyətlər bankın səhmdarlarının, bankın inzibatçılarının, qərarların qəbul edilməsində iştirak etmiş digər vəzifəli şəxslərin təkcə bankda olan depozitləri deyil, həmçinin, digər əmlakları məhz dövlətə və ictimai fondlara dəymiş zərərin ödənilməsi üçün istifadə edilməlidir".
Maraqlıdır, ekspertlərin buna münasibəti necədir?
Məsələyə münasibət bildirən ekspert Zakir Əhmədov bunu alqışladığını bildirdi: "Hesab edirəm ki, bu tam doğru yanaşmadır. Yaxşı olardı ki, bir qədər tez belə bir təşəbbüs qaldırılaydı. Çünki müşahidələr göstərir ki, problemli kreditlərin bu dərəcədə çoxalmasının başlıca günahkarları məhz bank rəhbərləridir. Onların kredit verilməsində məsuliyyətsiz davranışları vəziyyətin bu dərəcədə kritikləşməsinə gətirib çıxarıb. Digər tərəfdən, nə qədər əmanətçi var ki, banka qoyduğu pulu geri ala bilmir. Xüsusən də sığortalanmayan əmanətlərlə bağlı vəziyyət daha mürəkkəbdir. Belə olan halda, əlbəttə ki, bank rəhbərlərinin əmlakı müsadirə olunaraq satılmalıdır. Ondan əldə olunan gəlir borcların ödənilməsinə yönəldilməlidir. Hesab edirəm ki, indiki dövrdə bu ən optimal variantdır. Zatən, bir sıra inkişaf etmiş ölkələrin təcrübəsində sözügedən metodlardan geniş istifadə olunur. O halda, bu metod Azərbaycanda niyə də tətbiq olunmasın?!".
Vidadi ORDAHALLI
