Vüqar Bayramov: "Ona görə də bunun çoxşaxəli faydası var"
"Biz bir neçə ölkədə artıq ticarət evləri yaradırıq. "Made in Azerbaijan" brendi artıq dünyaya yayılıb". Bunu Prezident İlham Əliyev Saatlıda pambıqçılığın inkişafı məsələlərinə dair respublika müşavirəsində çıxışı zamanı deyib.
Dövlət başçısı qeyd edib ki, indi bütün siyasi təmaslarda, həmkarları ilə görüşlər əsnasında ən vacib məsələ məhz Azərbaycan məhsullarının ixracıdır: "Bu məsələni mən qaldırıram və siyasi dəstək olan yerdə, əlbəttə ki, bizim sahibkarlarımız üçün də yeni imkanlar yaranır".
Prezident vurğulayıb ki, sahibkarlar özləri də fəal olmalıdır, yeni bazarlara çıxmalıdırlar: "Onsuz da Azərbaycan dövləti bunu təşkil edir. Biznes-forumlar keçirilir, hökumət nümayəndələrinin tərkibində artıq iş adamları da həmişə təmsil olunurlar. Onlar da fəal olmalıdırlar, öz məhsullarını təbliğ etməlidirlər, çalışmalıdırlar ki, bu imkandan istifadə edib öz məhsullarını daha çox xarici bazarlara satsınlar. Biz əlbəttə ki, daxili bazarı da maksimum dərəcədə təmin etməliyik və bunu edirik".
"Made in Azerbaijan" brendinin dünyada tanınması Azərbaycan üçün nə deməkdir?
Məsələyə münasibət bildirən iqtisadçı-ekspert Vüqar Bayramovun fikrincə, bu, Azərbaycan istehsalı olan məhsulların tanıdılması baxımından əhəmiyyət kəsb edir: "Eyni zamanda, Azərbaycanın tanıdılmasına xidmət edir. Qeyd edək ki, Azərbaycanda istehsal olunan məhsulların tanıdılması üçün Avropanın aparıcı supermarketlərində xüsusi rəflərin hazırlanması nəzərdə tutulur. Bununla da Azərbaycan məhsullarının fərqli və yeni bazarlarda tanıdılmasına nail olmaq mümkün olacaq. Bu kontekstdən "Made in Azerbaijan", sadəcə, Azərbaycan məhsullarının tanıdılması deyil, həm də ölkəyə valyutanın daxil olması baxımından vacibdir. Çünki ölkə məhsulunun tanıdılması nəticəsində ona tələbin artması daha çox ixrac deməkdir. Eləcə də "Made in Azerbaijan" brendi ölkənin tanıdılması baxımından əhəmiyyətlidir. Bu da ölkəyə gələn turistlərin sayının artımına öz töhfəsini verəcək. Ona görə də bunun çoxşaxəli faydası var. "Made in Azerbaijan" brendi imkan verir ki, həm ölkə potensialını təqdim edə bilsin, ixrac imkanlarını artırsın, həm də ölkəyə daha çox valyuta gəlməsini təmin edə bilsin".
Vidadi ORDAHALLI
