Pambıqçılığın inkişafı məsələlərinə dair Saatlı rayonunda keçirilmiş respublika müşavirəsi və müşavirədə Prezident İlham Əliyevin çıxışı ölkədə pambıqçılığın inkişafına çox böyük təkan verəcək. Bunu Trend-ə Milli Məclisin deputatı Tahir Rzayev deyib.
T.Rzayev bildirib ki, Prezident müşavirədə pambıqçılıq sahəsində qazanılan nailiyyətləri təhlil etdi, həm də qarşıda duran vəzifələri müəyyən etdi.
Deputat qeyd edib ki, Azərbaycan iqtisadiyyatında pambıqçılıq mühüm yer tutur: “Pambıqçılıq sahəsində məhsuldarlığın artırılmasına diqqət yetirilməli, bu sahə inkişaf etdirilməlidir. Pambıqçılıq iqtisadi sahə olmaqla yanaşı, həm də minlərlə insanın iş yeridir. Pambıq eyni zamanda, ölkəyə valyuta gətirən məhsuldur”.
T.Rzayev vurğulayıb ki, Azərbaycanda pambıqçılığın inkişafı üçün yaxşı potensial var: “Suvarma texnologiyaları yaxşılaşdırılıb, ölkədə sahibkarlığa şərait yaradılıb, texnika gətirilib, gübrələr və toxumların gətiriliməsində və digər məsələlərdə sahibkarlara köməklik göstərilir”.
Deputat qeyd edib ki, pambıqçılığın inkişafı digər sahələrin də inkişafına təkandır: “Pambıqçılığın inkişafı toxuculuq, emal sənayesinin inkişafı, digər fabriklərin yaradılması və inkişaf etdirilməsinə zəmin yaradır. Artıq Azərbaycanda bu istiqamətdə işlərə başlanılıb. Ölkədə yeni müəssisələr tikilir. Bu müəssisələrdə minlərlə insan yeni iş yerləri ilə təmin ediləcək. Bütün bunlar isə ölkədə sosial rifahın inkişafına təkan olacaq”.
Azərbaycan artıq özünün iqtisadi siyasətini konseptual formada qeyri-neft sektorunun inkişafı üzərində qurub. Bunu isə Milli Məclisin deputatı Rüfət Quliyev deyib. Deputat vurğulayıb ki, qeyri-neft sektorunda əsas diqqət ixracyönümlü məhsulların istehsalına yönəlməlidir ki, bu məhsullar “Made in Azerbaijan” brendi ilə xaricə çıxarılsın və ölkəmizə valyuta gəlsin: “Bu gün Azərbaycan məhsulları dünyanın 60-dan çox ölkəsinə ixrac edilir. Artıq Azərbaycan öz milli brendləri ilə də dünyada tanınır, etibarlı tərəfdaşa çevrilib. Bu o deməkdir ki, Azərbaycan öz iqtisadiyyatını qeyri-neft sektoru hesabına qurub inkişaf etdirə bilər. Qeyri-neft sektorunun inkişafı iqtisadi məsələ olmaqla yanaşı, eyni zamanda sosial yönümlü məsələdir. Bu sektorun inkişafı yeni iş yerlərinin açılmasına səbəb olur, insanların məşğulluğu artır, sosial vəziyyətləri yaxşılaşır”.
Deputat vurğulayıb ki, vaxtilə üzümçülük, toxumçuluq, pambıqçılıq və digər bu kimi sahələr Azərbaycanda ənənəvi sahələr olub: “Azərbaycan yenidən bu sahələrin inkişafına böyük diqqət ayırır. Aydındır ki, onlar həmişə gəlirli sahələr olub. Üzümçülük, toxumçuluq, pambıqçılıq sahələrinin inkişafı digər sektorların, o cümlədən emal, toxuculuq sənayesninin inkişafına da şərait yaradır”.
R.Quliyev qeyd edib ki, qeyri-neft sektorunun, kiçik və orta sahibkarlığın inkişafı üçün ölkəmizdə lazımi şərait yaradılıb: “Sahibkarlar da fəal olmalıdır, yaradılmış imkanlardan maksimum yararlanmalı, bu sahələrin inkişafında yaxından iştirak etməlidirlər”.
