Natiq Cəfərli: "Problemli kreditlərin həcmi azalmalıdır"
Azərbaycanda Maliyyə Bazarlarına Nəzarət Palatasına (MBNP) "körpü banklar" yaratmaq səlahiyyətinin verilməsi nəzərdə tutulur. Bunu Milli Məclisdə İnzibati Prosessual, Mülki Prosessual məcəllələrə dəyişikliklərlə bağlı qanun layihələrinin müzakirəsi zamanı MBNP-nin Direktorlar Şurasının sədri Rüfət Aslanlı bildirib.
İnzibati Prosessual və Mülki Prosessual məcəllələrə dəyişikliklər gələcəkdə "Bank haqqında" Qanuna müvafiq dəyişikliklər etməyə zəmin hazırlamaq üçün təqdim edilib və qanun layihələrində "körpü bank"ların yaradılmasını nəzərdə tutan qətnamə anlayışı əksini tapıb. Məsələn, İnzibati Prosessual Məcəlləyə təklif edilən dəyişikliyə əsasən, MBNP-nin bankın qətnaməsi çərçivəsində qəbul etdiyi qərar məhkəmə tərəfindən ləğv edilə bilməz.
Müzakirələr zamanı R.Aslanlı bildirib ki, maliyyə bazarlarına nəzarət orqanı problemi olan, könüllü restrukturizasiya oluna bilməyən bankların icbari qaydada problemlərini həll etməlidir: "Bunun biri neçə yolu var. Banka aidiyyəti olan şəxslərin, yəni səhmdarların, bankın idarə edilməsi ilə bağlı qərarlar qəbul etmək səlahiyyətində olan şəxslərin bankdakı depozitlərini icbari qaydada onun səhmlərinə keçirmək, bankın səhmlərinin bir qismini çıxarıb satmaqla bazardan vəsaitlər cəlb etmək, bankın aktiv öhdəliklərinin birlikdə, yaxud ayrı-ayrılıqda çıxarılıb satılması ilə problemlərin həll edilməsi bura daxildir. Yaxud bankın müəyyən kapital kəsiri var, bunu müəyyən sağlam bir banka satmaqla artıq yeni sağlam bir maliyyə təchizatı formalaşdırmaq olar. Yəqin ki, gələcəkdə dünyada maliyyəçilər başqa yollar da tapa biləcək. Bizim təklif etdiyimiz qətnamə "körpü bank"ın yaradılmasıdır".
"Körpü bank" nədir? Bu bankın hansı səlahiyyətləri olacaq?
Mövzu ilə bağlı iqtisadçı-ekspert Natiq Cəfərliyə müraciət etdik. O, "Bakı-Xəbər"ə açıqlamasında qeyd etdi ki, Mərkəzi Bank və Maliyyə Bazarlarına Nəzarət Palatası bank sektorunun təhlükədə olduğunu anlayır: "Bank sektorunda yaşanan vəziyyətin həlli üçün onların bağlanması və onların aktivlərinin dövlət nəzarətinə verilməsi daha məqsədəuyğundur. Zənnimcə, bank sektoru üçün ən yaxşı çıxış yolu budur. Bir müddət bank sektorunda çalxalanma olsa da, sonra istənilən nəticə əldə olunacaq. Görünən odur ki, yumşaq keçiddən biri kimi "körpü bank"ların yaradılması vasitəsilə, bankların fəaliyyəti, onların borclarının, depozitlərinin və öhdəliklərinin birləşdirilməsi yolu ilə müəyyən dərəcədə prosesi idarə etməyi düşünürlər. "Körpü bank"ların yaradılmasının bank sektoruna təsir edəcəyini düşünmürəm. Çünki bank sektorunda problemlər daha dərin və ciddidir. Bu problemlərin həlli üçün uzunmüddətli və ucuz kreditlərə ehtiyac var. Problemli kreditlərin həcmi azalmalıdır".
Həmsöhbətimizin sözlərinə görə, "körpü bank"ların yaradılması bank sektorunda yaşanan vəziyyətin həllinə ciddi təsir etməyəcək. "Körpü bank"lar yaransa və ya yaranmasa da, problemli kreditlərin həcmi kifayət qədərdir.
Günel CƏLİLOVA
