Aydın Hüseynov: "Hər bir fermer dövlət qarşısında məsuliyyətini hiss etməli və bu istiqamətdə görülən işlər çərçivəsində öz töhfəsini verməlidir"
"Dövlət fermerlərə öz dəstəyini əsirgəmir. Hesab edirəm ki, fermerlərimiz üçün yaradılmış şərait heç bir başqa ölkədə yoxdur. Bizim fermerlər torpaq vergisi istisna olmaqla bütün vergilərdən azaddırlar. Həm investisiya, həm ixrac üçün təşviq mexanizmi artıq işə salınıb. Bu da fermerlərə əlavə stimul verir, onlar üçün əlavə imkanlar yaradır. İndi demək olar ki, bütün əsas kənd təsərrüfatı sahələri, o cümlədən pambıqçılıq üçün subsidiyalar verilir".
Bunu Prezident İlham Əliyev Saatlıda pambıqçılığın inkişafı məsələlərinə dair respublika müşavirəsində yekun nitqində deyib. Dövlət başçısı güzəştli şərtlərlə gübrələrin verildiyini qeyd edib: "Fermerlər gübrənin qiymətinin cəmi 30 faizini ödəyirlər. Güzəştli şərtlərlə yanacaq və kreditlər verilir. Mən artıq qeyd etdim ki, iqtisadiyyatın real sektoruna 2 milyard manat ən aşağı faizlə kreditlər ayrılıb. Bu əsasən bölgələrə gedən vəsaitdir... Bunu ona görə edirik ki, insanlar daha da yaxşı yaşasınlar, fermerlər, işləyən vətəndaşlar daha çox pul qazansınlar və onların yaşayış səviyyəsi artsın".
Prezident əmək resurslarından səmərəli istifadə edilməsinin vacibliyini vurğulayıb: "Həm yeni iş yerlərinin yaradılması ilə bağlı tədbirlər görülür və eyni zamanda, yaradılacaq proqnozlaşdırılan iş yerləri ilə bağlı biz əmək resurslarını səfərbər etməliyik ki, burada həm boşluq, həm əmək resurslarının çatışmazlığı yaranmasın, eyni zamanda, işsizlik də artmasın".
Həqiqətən də yaradılın sözügedən şərait fonunda fermerlər aktiv olmalı və istehsalı artırmalıdır. Bu, nəticə etibarilə, ölkənin kənd təsərrüfatı məhsullarına olan tələbatın yerli istehsal hesabına tam təmin olunmasına gətirib çıxara bilər. Maraqlıdır, bəs ekspertlər bunu necə dəyərləndirir?
Məsələyə münasibət bildirən millət vəkili Aydın Hüseynovun sözlərinə görə, yaradılan şəraitdən maksimum səmərəli istifadə edilməlidir: "Çünki nəzərə almaq lazımdır ki, fermerlərə birbaşa dövlət qayğısı, diqqət var. Fermerlərə dövlət vəsaiti hesabına subsidiyalar verilir, torpaq vergisini çıxmaq şərtilə digər vergilərdən azad olunublar. Ona görə də hər bir fermer dövlət qarşısında məsuliyyətini hiss etməli və bu istiqamətdə görülən işlər çərçivəsində öz töhfəsini verməlidir. Yaradılan bu şəraitdən maksimum optimal şəkildə istifadə edilməlidir. Belə olarsa, əlbəttə ki, ölkədə kənd təsərrüfatı məhsullarının istehsal səviyyəsi daha da artacaq. Nəticədə buna uyğun olaraq fermerlərin gəlirləri yüksələcək. O üzdən, fermerlər cənab Prezidentin səsləndirdiyi fikirlərdən düzgün nəticə çıxarmalıdır".
Vidadi ORDAHALLI
