İlqar Hüseynli: "İndi bunun birbaşa olaraq sərtləşdirilməsi, konkretləşdirilməsi vacib addımlardan biridir"
Nazirlər Kabineti vəzifəli şəxslərlə bağlı yeni məsuliyyət müəyyənləşdirib. Bununla bağlı qərarları baş nazir Artur Rasi-zadə imzalayıb.
"Dövlət büdcəsindən maliyyələşən idarə və təşkilatların büdcədənkənar vəsaitləri haqqında Əsasnamə"də edilən dəyişikliyə əsasən, bundan sonra büdcədənkənar vəsaitlərin təyinatı üzrə istifadə edilməməsinə görə vəzifəli şəxslər qanunla müəyyən edilən qaydada məsuliyyət daşıyır.
Bundan başqa, "Azərbaycan Respublikası gömrük sisteminin büdcədənkənar inkişaf fondu haqqında Əsasnamə və fondun vəsaitinin xərclənməsi Qaydaları"nda da dəyişiklik edilib. Belə ki, gömrük sisteminin inkişaf fondunun vəsaitinin təyinatı üzrə istifadə edilməməsinə görə vəzifəli şəxslər qanunla müəyyən edilən qaydada məsuliyyət daşıyır.
Nazirlər Kabineti "Kənd təsərrüfatı məhsullarının istehsalçılarına əkin sahəsinin becərilməsində istifadə etdiyi yanacaq və motor yağlarına, habelə buğda və çəltik əkininə görə dövlət büdcəsinin vəsaiti hesabına yardımların verilməsi Qaydaları"nın və "Aqrolizinq" Açıq Səhmdar Cəmiyyəti və digər hüquqi və fiziki şəxslər tərəfindən kənd təsərrüfatı məhsullarının istehsalçılarına mineral gübrələrin, biohumusun və pestisidlərin güzəştlə satılması Qaydaları"nda və digər bir sıra qurumlarla bağlı da eyni məzmunlu dəyişiklik edib.
Ümumən ekspertlər bunun əhəmiyyətini necə dəyərləndirir? Sözügedən yeniliklər büdcədənkənar vəsaitlərdən daha səmərəli istifadə olunmasına necə təsir göstərəcək?
Məsələyə münasibət bildirən ekspert İlqar Hüseynlinin sözlərinə görə, prinsipcə, bununla bağlı məsuliyyətin sərtləşdirilməsi müsbət haldır: "Büdcədənkənar vəsaitlərin səmərəli istifadəsi üçün birinci növbədə şəffaflıq olmalıdır. Hesabatlılığın şəffaf şəkildə olması vacib amillərdən biridir. Həmin gəlirlərin hansı istiqamətə yönəldilməsi, xərclərin nə dərəcədə səmərəli şəkildə istifadə olunması açıq və şəffaf olmalıdır. Məsələn, bəzi bələdiyyələr dövlətdən yığımlar edir, ancaq onun hansı istiqamətdə xərclənməsi ilə bağlı cəmiyyətə doğru-düzgün informasiyalar vermir. Eyni zamanda, bu məsələni digər özünü maliyyələşdirən, amma birbaşa dövlətlə əlaqəsi olan təşkilatlarla da bağlı qaldırmaq olar. O baxımdan hesab edirəm ki, büdcədənkənar xərclərin istifadə olunması ilə bağlı məsuliyyət yükü müəyyənləşdirilməlidir. Sözügedən məsuliyyətin təsiri altında vəsaitlərin düzgün xərclənməsi və açıq şəkildə hesabatların verilməsi məsələləri öz əksini tapsın. Yəni ümumi götürəndə onsuz da bu var idi. Ancaq indi bunun birbaşa olaraq sərtləşdirilməsi, konkretləşdirilməsi vacib addımlardan biridir. Yetər ki, ortada şəffaflıq olsun".
Vidadi ORDAHALLI
