Zakir Əhmədov: "Bütün bunlar həyata keçirilən sosialyönümlü siyasətin nəticəsidir"
"Biz ilin iki ayında ancaq dövlət sektorunda 40 mindən çox yeni iş yeri yaratmışıq". Bunu Prezident İlham Əliyev Novruz bayramı münasibətilə Bakıda keçirilən ümumxalq şənliyindəki çıxışında deyib. Dövlət başçısının sözlərinə görə, ölkədə iqtisadi vəziyyət yaxşılaşır. Ötən il iqtisadi sabitləşmə, dərin iqtisadi islahatlar ili olub. Bu islahatlar öz bəhrəsini artıq verməyə başlayıb: "Bu il isə artıq inkişaf ilidir. İlin iki ayının göstəriciləri bunu təsdiqləyir. Böyük olmasa da, iqtisadi artım var".
Ölkə başçısı əlavə edib ki, bu il iqtisadi inkişaf davam etdiriləcək: "Çox böyük planlarımız var. İnvestisiya proqramı real sektorun inkişafına xidmət göstərəcək. Bu il kənd təsərrüfatında il ərzində 150 min hektardan çox torpağa su veriləcək. Bu, 100 minlərlə iş yerinin yaradılması deməkdir. Bu, kənd təsərrüfatının və ixracın artırılması deməkdir. Biz ilin iki ayında ancaq dövlət sektorunda 40 mindən çox yeni iş yeri yaratmışıq. Nəyə görə? Ona görə ki, işsizlik artmasın. Çünki keçən il dövlət investisiyaları azalıb, xüsusilə tikinti sektorunda. Bəzi vətəndaşlar işlərini itiriblər. Bank sektorunda da problemlər yaşandı. Bəzi banklar bağlandı, vətəndaşlar işlərini itirdilər. Ona görə mən biznes qurumlarına da çağırış etdim ki, hər bir şirkət heç olmasa bir-iki nəfəri işə götürsün. Bəlkə bu onlara o qədər də lazım deyil, ancaq biznes də sosial məsuliyyətini dərk etməlidir. Bizim dövlət şirkətlərimiz və yerli icra orqanları üçün xüsusi büdcə ayrılıb. İndi 40 mindən çox insan ictimai işlərə və digər təmir-tikinti işlərinə cəlb edilib".
Dövlət imkanları çərçivəsində mövcud iqtisadi çətinlikləri aradan qaldırmağa çalışır. Bunun nəticəsidir ki, bu ilin iki ayında 40 min iş yeri açılıb.
Maraqlıdır, bəs ekspertlər bunu necə şərh edir?
Məsələyə münasibət bildirən ekspert Zakir Əhmədovun sözlərinə görə, bütün bunlar həyata keçirilən sosialyönümlü siyasətin nəticəsidir: "Əvvəlki dövrlərdə də dövlət bu missiyadan çıxış edərək bir sıra işlər görüb. Məsələn, 2008-ci ilin ortalarında neftin bir barrelinin qiyməti 150 dollar səviyyəsinə çatandan sonra kəskin ucuzlaşmağa başladı. Belə vəziyyət təxminən bir ildən çox davam etdi. Bunun nəticəsində Azərbaycanda 2009-cu ilin dövlət büdcəsinin həcmi artırılmadı. Halbuki, 2005-ci ildən başlayaraq büdcənin həcmi ilbəil artırılırdı. Neftin qiyməti sabitləşəndən sonra, 2010-cu ildən başlayaraq dövlət büdcəsi yenidən ilbəil artmağa başladı. Yaşanan böhranla əlaqədar 2009-cu ildə dövlət sifarişlərinin həyata keçirilməsi o zaman böhranın təsirlərini xeyli azaltdı. Böyük tikinti, infrastruktur layihələrinin həyata keçirilməsi kütləvi işsizliyin qarşısını aldı. Ancaq 2014-cü ilin ortalarından başlayaraq dünya bazarında neftin ucuzlaşması tendensiyası əvvəlki illərlə müqayisədə uzun çəkdi. Müşahidələr göstərir ki, yaxın perspektivdə neftin qiymətinin bahalaşması gözlənilmir. Bu səbəbdən hökumət ciddi islahatlar həyata keçirir, maksimum çalışır ki, iqtisadiyyatın neftdən asılılığı azalsın. Yəni ölkədə qeyri-neft sektoru inkişaf etsin, çoxşaxəli iqtisadiyyat yaransın. Artıq bu istiqamətdə görülən işlər öz səmərəsini verir. O cümlədən hökumət böyük ictimai işlər həyata keçirməklə yeni iş yerləri yaradır ki, insanlar işsizlikdən əziyyət çəkməsin. Ona görə də bu ilin iki ayında 40 min iş yerinin yaradılmasını müsbət dəyərləndirirəm".
Vidadi ORDAHALLI
