Oqtay Haqverdiyev: "Vergi ödəyicilərinin sayında artımın qeydə alınması gözlənilən idi"
Fikrət Yusifov: "Bu, Azərbaycanda aparılan son vergi islahatlarının bilavasitə nəticəsidir"
Bu ilin yanvar ayında Azərbaycanda 29 min yeni vergi ödəyicisi qeydiyyata alınıb. Bunu Azərbaycan Sahibkarlar Konfederasiyasında (ASK) "Vergi sistemində aparılan islahatlar: vergi qanunvericiliyində və inzibatçılığında yeniliklər" mövzusunda iş adamları ilə keçirilən görüşdə vergilər nazirinin müşaviri Ələkbər Məmmədov deyib.
Ə.Məmmədovun sözlərinə görə, bu, ötən ilin analoji göstəricisinə nisbətən 4 dəfə çoxdur: "2016-cı ilin yanvarında bu rəqəm 7 minə bərabər olub. Bu ilin yanvarına olan məlumata görə, qeydiyyatda olan vergi ödəyicilərinin sayı 700 mindən çoxdur. Onların 100 mindən bir qədər çoxu hüquqi şəxslər, digər hissəsi isə fiziki şəxslərdir".
Vergi ödəyicisi qeydiyyatında artımın qeydə alınması ilə bağlı fikir bildirən iqtisadçı-ekspert Oqtay Haqverdiyev "Bakı-Xəbər"ə açıqlamasında qeyd etdi ki, bu gözlənilən idi. Gəlir əldə edən vətəndaşın vəzifəsidir ki, müəyyən həcmdə vergi ödəsin: "Biz çalışırıq ki, sahibkarların sayı çoxalsın. Onların sayı artarsa, bunun iqtisadiyyata müsbət təsiri olar".
Həmsöhbətimiz onu da əlavə etdi ki, qeydiyyatdan keçməyənlərin də sayı yetərincədir. Ekspertin sözlərinə görə, hər bir ölkədə olduğu kimi, bizdə də gizli iqtisadiyyat var: "Amma onun hamısının qeydiyyata alındığını demək çətin məsələdir. Kölgə iqtisadiyyatının faizi ümumdaxili məhsuldan çox yüksəkdir. Mənim hesablamalarıma görə, bu rəqəm 35 faizdir. Ancaq beynəlxalq qurumlar bu rəqəmin yüksək olduğunu iddia edir".
Müsahibimizin fikrincə, vergi ödəyicilərinin qeydiyyatında artımın qeydə alınması səbəblərindən biri vergi ödəyicilərinin məlumatlandırılmasıdır.
Məsələ ilə bağlı "Ekonomiks" Beynəlxalq İqtisadi Araşdırmalar Birliyinin sədri Fikrət Yusifovun da fikrini öyrəndik. O, vergi ödəyicilərinin say artımını son vergi islahatlarının bilavasitə nəticəsi kimi xarakterizə etdi: "Əldə olunan məlumatlara görə, bu ilin əvvəlinə qeydiyyatda olan vergi ödəyicilərinin sayı 700 mindən artıq olub. Cari ilin yanvar ayında vergi ödəyicilərinin sayının keçən ilin yanvar ayı ilə müqayisədə 4 dəfədən çox artması Azərbaycanda aparılan son vergi islahatlarının bilavasitə nəticəsidir. Bu islahatlara ötən il aparılmış vergi sadələşdirilmələri, vergi ödəyiciləri ilə vergi müfəttişliyinin əməkdaşları arasında işçi mühitin daha təkmil bir müstəviyə çıxarılması, vergi dərəcələrinin azaldılması və onların ödəyicilər üçün daha əlçatan edilməsi istiqamətində görülən işlər, ölkə başçısının müvafiq fərmanı ilə tətbiq olunan vergi amnistiyaları, vergilərin ödənişi ilə bağlı bir sıra digər güzəştlərin tətbiqi kimi addımlar daxildir. Vergi ödəyicilərinə yaradılan bu münbit şərait onlar üçün böyük bir stimuldur. Belə stimul isə hər bir ödəyicini daha məsuliyyətli edir və mövcud vergi ödənişi qaydaları çərçivəsində hər kəs dövlət qarşısında öz öhdəliyini yerinə yetirməyi vergidən yayınmaqdan daha üstün tutur. Vergi ödəyicilərinin sayında bu il ötənilki artımdan 4 dəfədən çox artımın qeydə alınmasının əsas səbəbi də budur".
Günel CƏLİLOVA
