Zakir Əhmədov: "Bakıda mənzillərin qiyməti anormal səviyyədə bahadır və bunun iqtisadi əsası yoxdur"
Uyğun qiymətə mənzil təminatında ilk növbədə gənc ailələrə üstünlük veriləcək. Bunu mətbuata açıqlamasında Mənzil İnşaatı Dövlət Agentliyinin (MİDA) direktoru Samir Nuriyev deyib. Agentliyin rəhbəri qeyd edib ki, təklif olunan sosial mənzillər bazar qiymətindən aşağı olacaq: "Gözləyirik ki, qiymətlər təqribən 20-25 faiz aşağı olsun. Bu həm də tikiləcək binaların yerləşdiyi ərazidən asılıdır".
Samir Nuriyev, həmçinin, əlavə edib ki, regionlarda da uyğun qiymətə mənzillərin tikintisi prioritet məsələdir. Lakin layihə əvvəlcə böyük şəhərlərdə reallaşdırılacaq.
Bu zaman bütün meyarlar - yol infrastrukturu, iş yerlərinin yaxınlığı nəzərə alınacaq.
MİDA direktorunun açıqlamasından o da məlum olub ki, vətəndaşlara veriləcək sosial evlərlə bağlı qeydiyyat növbəlilik prinsipi əsasında olmayacaq. Onun sözlərinə görə, mənzillər satışa çıxarıldıqdan sonra elektron sistemdə kim tez sifariş verəcəksə, o da mənzili alacaq: "Erkən gələn erkən də məzilə sahib olacaq. Mənzillər tam təmirli, mətbəx mebeli ilə birgə veriləcək. Yaşayış massivləri hazır olduqdan sonra onların idarə edilməsi ilə bağlı MİDA MMC öz təkliflərini verəcək".
Nəzərə alsaq ki, təklif olunacaq sosial mənzillər digər evlərdən 25 faiz ucuz olacaq, o zaman bu, aztəminatlı ailələrin mənzil təminatının yaxşılaşmasında necə rol oynayacaq? Məsələyə münasibət bildirən ekspert Zakir Əhmədovun sözlərinə görə, sözügedən layihə aztəminatlı ailələrin evlə təmin olunmasında mühüm rol oynayacaq: "Çünki həmin mənzillər uzun müddətə kreditlə, özü də güzəştli şərtlərlə veriləcək. Şərtlərin güzəştli olması imkan verəcək ki, daha çox aztəminatlı vətəndaş mənzil sahibi olsun. Məsələ ondadır ki, mənzillərin sahəsinin az olması onların maya dəyərinə müsbət təsir göstərir. Bir sıra amillər maya dəyərini aşağı salır. Bura torpağın pulsuz alınması, kommunal qovşaqlara qoşulmasının (qaz, işıq, su) asanlığı və tikintiyə icazələrlə bağlı xərclərin cüzi olması aiddir. O üzdən, bütün bunlar müsbət faktor hesab olunur. Maya dəyəri buna görə də minimum 20 faiz aşağı olmalıdır. Hesab edirəm ki, bazarda təklif olunan ucuz sosial mənzillər ümumən mənzil bazarında qiymətlərin ucuzlaşmasına təsir göstərəcək. Çünki Bakıda mənzillərin qiyməti anormal səviyyədə bahadır və bunun iqtisadi əsası yoxdur. Yəni qiymətlərin belə baha olmasının kökündə süni amillər dayanır".
Vidadi ORDAHALLI
