25-27 fevral tarixləri arasında İordaniya Haşimilər Krallığının paytaxtı Amman şəhərində LE Royal Hoteldə Kral II Abdulla ibn Huseynin himayəsilə Global Healthcare Travel Forum (Qlobal Sağlıq Turizmi Forumu) zirvəsi baş tutub.
60-a yaxın ölkədən 500-dən artıq nümayəndənin iştirak etdiyi forumda Azərbaycanı Sağlamlıq və Termal Turizmə dəstək Assosiasiyasının prezidenti Ruslan Quliyev təmsil edib. Məlumat üçün qeyd edək ki, Azərbaycan 2013-cü ildən bu qurumda təmsil olunur. 2014-cü ildən isə Təşkilatın idarə heyətində öz yerini möhkəmləndirərək uğurla fəaliyyət göstərir. Təşkilatın ilk prezidenti Türkiyə Sağlıq turizmi Konseyi başkanı Emin Çakmak olub. O hazırda qurumun fəxri prezidentidir. Təşkilatın indiki prezidenti isə İordaniya Özəl Xəstəxanalar Assosiasiyasının sədri Dr. Feyzi Al-Hammoridir.
Zirvə toplantısının açılış mərasimində İordaniya Haşimilər Krallığının baş naziri Hani Al-Mulki, İordaniya Haşimilər Krallığının şahzadələri Xanım Ghida Talal və Dina Mired, səhiyyə naziri Mahmud Al-Şeyyab və turizm naziri Lina Mazhar Annab iştirak edib. Açılışdan sonra Forum iki gün boyunca stend nümayişləri, panel və B2B görüşlər formatında davam etdirilib. Global Healthcare Travel Concil stendində təmsil olunan AHTTSA sistemli şəkildə öz həmkarlarına Azərbaycan sağlamlıq turizmi potensialı (Abşeron, Naftalan, Qalaaltı, Duzdağ, Qəbələ, İstisu və s.) haqqında geniş məlumat verib, qonaqlara turizm potensialını əks etdirən çap və elektron reklam-təbliğat materialları paylanıb.
İordaniya Haşimilər Krallığının baş naziri Hani Al-Mulki, şahzadələr Ghida Talal və Dina Mired stendi ziyarət ediblər. Ümumilikdə, 7 panel görüşməsi təşkil olunub. Müzakirə olunan aktual mövzular içərisində sağlamlıq turizminə qlobal baxış, Qlobal Sağlamlıq Turizmi destinasiyaları, leqallaşma,tənzimləmə və akreditasiya, təhsil və tədqiqat, sağlamlıq turizmində öləkələrarası əməkdaşlıq, brendinq və marketinq strategiyaları, medikal turizm, dental turizm, SPA və velnes turizmi, kulinariya turizmi, idman turizmi, 3-cü yaş qrupu turizminin xususi maraq kəsb etdiyi vurğulanaraq, yeni tendensiyaların şaxəli inkişafı hədəf kimi qəbul olunub.
Forum çərçivəsində Türkiyə heyəti ilə birgə Azərbaycan Respublikasının İordaniya Krallığındakı səfirliyində gedilərək, Xocalı soyqırımı günü anılıb, səfirlik tərəfindən təşkil olunan foto-stend təqdim olunub. Həmçinin, Türkiyə Böyükelçiliyi də ziyarət olunub.
Forumun son günü-27 fevral tarixində Global Healthcare Travel Concil (GHTC)-nin baş Assambleyasının qapalı toplantısı və idarə heyətinə seçkilər keçirilib. Türkiyə Sağlıq Turizmi Konseyinin təşəbbüsu və dəstəyi ilə Azərbaycan Sağlamlıq və Termal Turizminə Dəstək Assosiasiyasının prezidenti Ruslan Quliyev Qlobal Sağlamlıq Turizmi Təşkilatının vitse-prezidenti seçilib və iştirakçılara Azərbaycan haqqında geniş məlumat verilib. Təşkilatın yeni prezidenti isə Birləşmiş Ərəb Əmirliklərini təmsil edən Health Beyond Border təşkilatının təsisçisi xanım Leyla Aljasmi olub.
Sonda "Qlobal Sağlıq Turizminin Amman deklarasiyası" qəbul olunub.
Baki-xeber.com
