Vahid Məhərrəmov: "Kənd təsərrüfatı məhsullarının istehsalı və qablaşdırılması ilə bağlı bir sıra problemlər həll olunmalıdır"
"Türkiyə və Azərbaycan kənd təsərrüfatı məhsullarını digər ölkələrə birgə ixrac edə bilər". Xəbər verildiyi kimi, bu barədə mətbuata açıqlamasında Türkiyənin ərzaq, kənd təsərrüfatı və heyvandarlıq naziri Faruk Çelik bildirib.
Onun sözlərinə görə, Türkiyə, həcmindən və uzaq məsafədə yerləşməsindən asılı olmayaraq, ixrac üçün daim yeni bazarlar axtarır: "Türkiyə 192 ölkəyə 1680 adda, 17 milyard dollar dəyərində kənd təsərrüfatı məhsulları ixrac edir. Lakin bu rəqəmlər bizim üçün qənaətbəxş deyil. Düşünürəm ki, Azərbaycanla birgə çox şey etmək olar".
F.Çelik qeyd edib ki, Türkiyənin Avropa və Yaxın Şərqə, Azərbaycanın isə Rusiya və Orta Asiyaya çıxışı olduğunu nəzərə alsaq, Ankara və Bakı səmərəli qarşılıqlı fəaliyyət göstərə bilər: "Əminəm ki, Azərbaycan kənd təsərrüfatı məhsullarının istehsalının inkişafı üçün zəruri addımlar atacaq".
Bütün bunlarla yanaşı, Azərbaycan-Türkiyə Kənd Təsərrüfatı Biznes Forumu keçiriləcək. Bakıda keçiriləcək forumda məqsəd aqrar sahədə ikitərəfli əlaqələri keyfiyyətcə yeni mərhələyə qaldırmaqdır. Bu münasibətlə Türkiyədə kənd təsərrüfatı sahəsi üzrə fəaliyyət göstərən 150-yə yaxın şirkətin nümayəndəsinin Bakıya gələcəyi gözlənir.
Məlumat üçün onu da qeyd edək ki, ötən il Türkiyə Azərbaycana 118 milyon, Azərbaycan isə Türkiyəyə 2 milyon dollar məbləğində kənd təsərrüfatı məhsulları ixrac edib.
Maraqlıdır, Türkiyə və Azərbaycan kənd təsərrüfatı məhsullarını üçüncü ölkəyə necə birgə ixrac edə bilər? Bunun mexanizmləri nədən ibarətdir?
Sözügedən məsələ ilə bağlı fikirlərini "Bakı-Xəbər"lə bölüşən kənd təsərrüfatı sahəsi üzrə ekspert Vahid Məhərrəmovun sözlərinə görə, bunun üçün bir sıra tədbirlərin görülməsinə ehtiyac var: "Azərbaycan Türkiyədən idxal etdiyi bir sıra kənd təsərrüfatı məhsullarını Rusiyaya ixrac edir. Hətta Rusiyadan Türkiyəyə qadağa qoyulanda belə sözügedən işlər görülürdü. Kənd təsərrüfatı məhsullarının birgə digər üçüncü ölkəyə satılması praktikası dünyada o qədər də geniş yayılmayıb. O üzdən, bunun mexanizmi barədə konkret fikir söyləmək çətindir. Ancaq hesab edirəm ki, Azərbaycanda kənd təsərrüfatı məhsullarının istehsalı və qablaşdırılması ilə bağlı bir sıra problemlər həll olunmalıdır. Yoxsa, Türkiyədən məhsul idxal edərək onu iki ölkə adından digər dövlətə satmaq yetərli deyil. Düzdür, bundan bəzi sahibkarlar gəlir, dividend götürəcək. Ancaq strateji baxımdan bu elə də perspektivli görünməyə bilər. O üzdən, Azərbaycan kənd təsərrüfatı məhsullarının istehsalını genişləndirməlidir. Nəzərə almaq lazımdır ki, ölkəmizdə istehsal olunan kənd təsərrüfatı məhsullarının keyfiyyəti daha üstündür. Azərbaycanın istehsal etdiyi tərəvəz məhsullarına Rusiya daha çox dəyər verir. Bu səbəbdən çalışmalıyıq ki, ölkədə istehsal artsın və Azərbaycan brendi dünya bazarında öz layiqli yerini tutsun. Yalnız o halda biz uğur qazana bilərik".
Vidadi ORDAHALLI
