Türkiyəli nazir: “Azərbaycanla ticarət həcmi potensiala cavab vermir”
Azərbaycan Türkiyə şirkətlərini müxtəlif sahələrdə birgə müəssisələrin yaradılmasına dəvət edir. Trend-in məlumatına görə, bunu Bakıda keçirilən Azərbaycan-Türkiyə biznes-forumu zamanı Azərbaycanın kənd təsərrüfatı naziri Heydər Əsədov deyib.
O bildirib ki, Azərbaycanla Türkiyə arasında kənd təsərrüfatı sahəsində münasibətləri idxal-ixrac seqmentindən birgə məhsul istehsalı seqmentinə keçirmək lazımdır.
Nazir deyib: “Ötən il Türkiyə Azərbaycandan 100 milyon dollar həcmində kənd təsərrüfatı məhsulu ixrac edib. Bu iki ölkə arasında yaxşı göstəricidir, amma artıq münasibətlərin yeni səviyyəsinə keçmək lazımdır. Kənd təsərrüfatı məhsullarının istehsalı üçün birgə müəssisələrin yaradılması hər iki ölkə üçün faydalı olardı”.
Onun sözlərinə görə, Azərbaycan türkiyəli biznesmenlər üçün bütün zəruri şərtləri yaratmağa hazırdır: “Bizdə artıq lazımi hüquqi baza yaradılıb, aparılan islahatlar isə ölkədə biznes-mühiti əhəmiyyətli dərəcədə yaxşılaşdırıb”.
H.Əsədov qeyd edib ki, Azərbaycan hazırda əczaçılıq sahəsini aktiv şəkildə inkişaf etdirir və bu sahədə də birgə müəssisələrin yaradılmasında maraqlıdır.
Türkiyənin qida, kənd təsərrüfatı və heyvandarlıq naziri Faruk Çelik isə deyib ki, neft qiymətlərinin azalmasına baxmayaraq, Azərbaycan iqtisadiyyatının səmərəli idarə edilməsini təmin edib. Nazir bildirib ki, Türkiyə və Azərbaycanın inkişafı qarşısında bir çox maneələr yaradılıb: "Azərbaycan torpaqlarının Ermənistan tərəfindən işğalı və Xocalı qətliamı, eləcə də Türkiyədə terror aktları və hərbi çevriliş cəhdinin məqsədi bizim inkişafımıza mane olmaq idi".
Onun sözlərinə görə, 2050-ci ildə dünya əhalisinin sayı 10 milyarda yaxınlaşacaq: "Buna görə də dünyada kənd təsərrüfatı məhsullarının istehsalı 60 faiz artırılmalıdır".
F.Çelik qeyd edib ki, Türkiyə Avropanın ən böyük kənd təsərrüfatı məhsullarının istehsalı mərkəzidir: "Bu gün biznes-forum iştirakçılarının üzərinə böyük vəzifə düşür. Bu forumun kənd təsərrüfatı sahəsində əlaqələrimizi gücləndirəcəyinə əminəm. Türkiyə və Azərbaycanın coğrafi mövqelərini nəzərə alsaq, əməkdaşlığımızın nəticəsini təsəvvür etmək olar".
F.Çelik bildirib ki, Türkiyə və Azərbaycan arasında kənd təsərrüfatı məhsulları üzrə ticarətin həcmi potensiala cavab vermir. O qeyd edib ki, Türkiyə və Azərbaycan arasında mövcud 120 milyon dollar həcmində kənd təsərrüfatı məhsullarının ticarət həcmi potensiala cavab vermir: "Biz bu səviyyəni artırmalı və ixrac məhsullarının çeşidini genişləndirməliyik".
Nazir bildirib ki, iki ölkə arasında bir çox sahələrdə əlaqələri inkişaf etdirmək mümkündür: "Bu gün keçirilən biznes-forum iki ölkənin iş adamları arasında sıx əlaqə yaradacaq".
F.Çelik Azərbaycanın kənd təsərrüfatı nazirini fəxri qonaq qismində Türkiyədə keçiriləcək Afrika ölkələrinin kənd təsərrüfatı nazirlərinin toplantısına dəvət edib.
“Türkiyə Azərbaycanda kənd təsərrüfatının inkişafı üzrə nümayəndəlik açacaq”. Bunu da H.Əsədov deyib. Nazir qeyd edib ki, nümayəndəlik Türkiyənin Azərbaycandakı səfirliyi yanında açılacaq: "Səfirlikdə xüsusi nümayəndə - Türkiyənin qida, kənd təsərrüfatı və heyvandarlıq nazirinin müşaviri təyin ediləcək. O, iki ölkə arasında kənd təsərrüfatı sahəsində əməkdaşlığın inkişafına məsul olacaq".
