Pərviz Heydərov: "Bu məsələ yeni ideyaların və ticarət əlaqələrinin genişləndirilməsi üçün bir başlanğıc ola bilər"
Türkiyə Azərbaycanın Naxçıvan Muxtar Respublikasında istehsal olunan məhsulların idxalçılarını gömrük rüsumlarının ödənişindən azad etməyə hazırdır.
Bu barədə "Trend"ə Türkiyənin ərzaq, kənd təsərrüfatı və heyvandarlıq naziri Faruk Çelik bildirib. Onun sözlərinə görə, Türkiyənin şərq vilayətlərinin tələbatını təmin etmək üçün sərhədyanı ticarət çərçivəsində qonşu ölkələrdən bir sıra ərzaq məhsulları idxal oluna bilər: "Bununla belə, Türkiyə Ümumdünya Ticarət Təşkilatının qaydalarına uyğun fəaliyyət göstərməlidir".
F.Çelik qeyd edib ki, Türkiyə Nazirlər Kabineti ötən il "Sərhədyanı ticarətin nizamlanması haqqında" qərar qəbul edib. Bu qərara əsasən, Naxçıvandan ölkənin sərhədyanı vilayətlərinə idxal müəyyən edilmiş limit çərçivəsində həyata keçiriləcək: "Bu qərarla əlaqədar olaraq, Naxçıvandan idxal olunan mallara münasibətdə gömrük rüsumunun sıfır dərəcəsi tətbiq ediləcək. Naxçıvan Türkiyə ilə Azərbaycan arasında "birləşdirici halqa"dır. Naxçıvan coğrafi mövqeyinə görə strateji əhəmiyyət kəsb edir".
Xatırladaq ki, bundan əvvəl Azərbaycan iqtisadiyyat nazirinin müavini Sahil Babayev media nümayəndələrinə Naxçıvan Muxtar Respublikasında istehsal olunan malların tədarükü zamanı gömrük güzəştləri əldə etmək üçün Türkiyə ilə danışıqlar aparıldığını bildirmişdi.
Naxçıvanda istehsal olunan məhsulların Türkiyəyə tədarükü zamanı güzəştlərin tətbiq edilməsi ekspertlər tərəfindən də müsbət dəyərləndirilir. Onların fikrincə, blokada şəraitində olan Muxtar Respublikada istehsal olunan aqrar məhsulların Türkiyəyə ixracı zamanı gömrük güzəştinin tətbiq edilməsi aqrar sahənin inkişafına təkan verəcək.
İqtisadiyyat Nazirliyi İqtisadi İslahatlar Elmi-Tədqiqat İnstitutunun aparıcı elmi işçisi Pərviz Heydərov "Bakı-Xəbər"ə açıqlamasında qeyd etdi ki, Naxçıvan Azərbaycanın əsas ərazisi ilə qurudan heç bir əlaqəyə malik deyil: "Odur ki, buranın həmsərhəd ölkələrlə iqtisadi-ticari əlaqələri həyati əhəmiyyət kəsb edir. Birinci növbədə, bu baxımdan, Naxçıvandan ixrac məhsullarına müvafiq güzəştlərin tətbiqi vacib sayılır. İkinci tərəfdən isə, söhbət ərzaq və ümumiyyətlə, kənd təsərrüfatı məhsullarından gedirsə, bu olduqca əhəmiyyətli bir məsələdir. Kənd təsərrüfatı qeyri-neft sektorunun əsas tərkib hissəsidir. Sırf daxili bazar üçün istehsal etmək bolluq yarada bilməz və heç bir istehsalçının maraqlarına tam cavab verməz. Odur ki, ixrac imkanları olmalıdır. Özlərinin də etiraf etdikləri kimi, istər Türkiyədə olsun, istər İranda, istərsə də şimal qonşumuz olan Rusiyada Azərbaycanın kənd təsərrüfatı mallarına böyük tələbat var. Belə olan şəraitdə qarşı tərəflərdə niyə də müvafiq şərait yaradılmasın ki? Bu məsələlər hökumətlər arasındakı münasibətlər səviyyəsində həllini tapmalıdır. Konkret olaraq Türkiyə tərəfi Naxçıvanın bu ölkənin şərq vilayətləri ərazisinə - mövcud istehlak bazarlarına çıxışına sıfır dərəcədə gömrük rüsumları tətbiq etsə, bu, ucuz idxala şərait yaratmaqla yanaşı, təklifin sonradan daha da genişlənməsi ilə nəticələnə bilər. Yəni Naxçıvanın özündə də istehsal və tədarük artar. Naxçıvan həm də Türkiyə ilə Azərbaycan arasında bir körpüdür. Yəni bu məsələ, strateji baxımdan da, yeni ideyaların və ticarət əlaqələrinin genişləndirilməsi üçün bir başlanğıc ola bilər".
Günel CƏLİLOVA
