Sevgim Rəhmanov: "Hansısa yerli məhsulun qiymətinin baha olması istehsalın baha olması ilə bağlıdır"
Eyyub Hüseynov: "Yerli istehsal kərə yağının qiymətinin baha olması fermer təsərrüfatının inkişaf etməməsi və kooperasiyaların yaradılmaması ilə bağlıdır"
Manatın məzənnəsinin xarici valyutaya nisbətən dəyişməsindən sonra istehlak bazarında bahalaşma müşahidə olundu. Bahalaşmaya səbəb isə xaricdən gətirilən mallardır. Buna görə də hər kəs bazardan büdcəsinə uyğun məhsullar alır. Alıcılar daha çox yerli məhsula üstünlük verir. Səbəb isə qiymətin xaricdən gətirilən məhsullarla müqayisədə ucuz olmasıdır.
Ancaq son günlər yerli istehsal olan bəzi məhsulların qiymətində bahalaşma qeydə alınır. Bu hal daha çox özünü kərə yağında göstərir.
Redaksiyamıza müraciət edən şikayətçi bildirdi ki, marketlərdə satılan yerli kərə yağı Yeni Zelandiya istehsalı olan "Ankor" yağından bahadır. Şikayətçi deyir ki, qənaət etmək üçün yerli kərə yağını almaq istəyib. Lakin marketdə gördüyü mənzərədən sonra fikrindən daşınıb: "Düşündüm ki, yağ bahalaşıb, yerlisini alım. Ən azı gömrük xərci çıxmır. Ancaq baxdım ki, "Ankor" yağının qiyməti 13,20, almaq istədiyim yerli kərə yağı isə 13,55 civarındadır".
Yerli istehsal olan məhsulların qiyməti nə səbəbdən bahalaşır? Məsələ ilə bağlı ekspertlərə müraciət etdik.
İstehsalçılar və Tacirlər Birliyinin rəhbəri Sevgim Rəhmanov "Bakı-Xəbər"ə açıqlamasında qeyd etdi ki, bazar iqtisadiyyatında qiyməti istehsalçı təyin edir: "Ola bilsin ki, istehsalçı öz məhsulunu filan qiymətə satır. Buna heç kim müdaxilə edə bilməz. Xarici istehsal olan hansısa kərə yağının yerli istehsaldan ucuz olması onun istehsal tarixi ilə bağlı ola bilər. Ola bilsin ki, həmin yağın istehsal tarixi bitmək üzrə olduğu üçün, marketlər onu ucuz qiymətə satışa çıxarır".
Həmsöhbətimizin sözlərinə görə, hansısa yerli məhsulun qiymətinin baha olması istehsalın baha olması ilə bağlıdır. Qablaşdırılma istehsalçıya baha başa gəldiyi üçün, qiymətlər digərləri ilə müqayisədə baha olur".
Azad İstehlakçılar Birliyinin rəhbəri Eyyub Hüseynov qəzetimizə açıqlamasında bildirdi ki, yerli və xarici istehsal olan məhsulların qiymətində müəyyən problemlər qeydə alına bilər: "Yerli istehsal kərə yağının qiymətinin baha olması fermer təsərrüfatının inkişaf etməməsi və kooperasiyaların yaradılmaması ilə bağlıdır. Bu səbəbdən də həmin yağların maya dəyəri baha başa gəlir. Onu da unutmaq lazım deyil ki, azad bazar iqtisadiyyatıdır. İstehsalçı öz məhsulunu neçəyə istəsə sata bilər".
Ekspertin sözlərinə görə, ötən il Yeni Zelandiyaya gedib və həmin ölkədə istehsal olunan "Ankor" yağının hazırlanma qaydası ilə tanış olub: "Bu yağın keyfiyyətinə söz ola bilməz. Təmiz inək südündən hazırlanır. Gətirilmə xərclərini də öyrəndim. Demək bu məhsul Poti limanına qədər gəmi ilə gətirilir və qiyməti də münasibdir".
Günel CƏLİLOVA
