Rəsul Cahangirli: "Ötən ildən başlayaraq Azərbaycanda islahatların daha da sürətləndirilməsi..."
Rusiyanın İqtisadi İnkişaf və Maliyyə nazirlikləri əməkhaqlarının nağd şəkildə verilməsinin məhdudlaşdırılmasını nəzərdən keçirir. Bu barədə "Vedomosti" qəzetinə hökumətdəki mənbə bildirib. Bununla yanaşı, hökumət irihəcmli satınalmaların nağd qaydada aparılmasını məhdudlaşdırmaq niyyətindədir. Bildirilir ki, hələlik məsələ hökumət səviyyəsində müzakirə olunmayıb.
"Söhbət avtomobil, mənzil və bahalı əşyaların nağdsız şəkildə aparılmasından gedir", - deyə mənbə bildirib.
Eyni zamanda, hökumət bəzi nağdsız əməliyyatlara da verginin tətbiq olunmasını müzakirə edir. Mənbə qeyd edir ki, bu cür praktika Hindistan və Azərbaycanda mövcuddur. "Bu təkliflərin bəziləri hökumətin 2018-2024-cü illərdə iqtisadi inkişaf planına daxil edilə bilər", - deyə mənbə əlavə edib.
Qəzet Azərbaycan praktikası üzərində xüsusi dayanıb. Nəşr qeyd edir ki, 2017-ci ilin aprel ayından etibarən Azərbaycanda nağdsız ödənişlər barədə yeni qanun işə düşür. Sənədə əsasən, ƏDV ödəyicisi olan və illik dövriyyəsi 200 min manatı ötən ticarət və iaşə obyektləri ay ərzində yalnız 30 min manatadək məbləğdə əməliyyatları nağd şəkildə apara bilər. Digər vergi ödəyiciləri üçün bu limit 15 min manat təşkil edir. İllik dövriyyəsi 200 min manatı ötən vergi ödəyiciləri əməkhaqlarını yalnız nağdsız şəkildə köçürə bilər.
Ümumilikdə, ekspertlər Rusiyanın bu məsələ ilə bağlı Azərbaycanın təcrübəsini öyrənməsinə necə yanaşır? Sözügedən məsələni dəyərləndirən ekspert Rəsul Cahangirlinin fikrincə, Rusiyanın Azərbaycan təcrübəsi ilə tanış olması müsbət haldır: "Bu onu göstərir ki, Azərbaycanda bu istiqamətdə görülən işlər digər dövlətlərin də diqqətini cəlb edir. Nəzərə almaq lazımdır ki, son dövrlər bununla bağlı Azərbaycanda ciddi işlər görülür. Bununla bağlı geniş tədbirlər planı hazırlanıb. Aprel ayında nağdsız ödənişlərlə bağlı yeni qanun işə düşəcək. Çünki ödənişlərin nağd formada aparılması inflyasiya təzyiqlərini artırır. Bu da indiki dövrdə həlli vacib olan məsələlərdən biridir. Ötən ildən başlayaraq Azərbaycanda islahatların daha da sürətləndirilməsi bir sıra sahələrdə çevik idarəetmə sisteminin yaradılmasına xidmət edir. Bunlardan biri də nağdsız hesablaşmaların çəkisinin artırılmasıdır. Rusiya böyük dövlət olduğuna görə bir sıra ölkələrin təcrübəsini nəzərdən keçirir. Son nəticədə onlar üçün ən uyğun olanı hansıdırsa, ona üstünlük verəcəklər".
Vidadi ORDAHALLI
