Azərbaycanın turizmdən daha çox qazana bilməsi yolunda ən böyük problem...

Tarix: 23.04.2016 / 00:42
Bölmə: İqtisadiyyat

Yay fəsli yaxınlaşdıqca turizmdə də müəyyən canlanma hiss olunur. həyata keçirilən tədbirlər, görülən işlər, həmçinin regionda gedən müəyyən proseslərin bu dəfə Azərbaycana xaricdən də xeyli sayda turist axınına səbəb olacağı gözlənir. Xüsusən də şimal qonşumuzdan Azərbaycana böyük sayda turist axınının olacağı proqnozlaşdırılır.

"İzvestiya" nəşri isə yazır ki, Rusiya turoperatorları yaxın xaricə, xüsusilə də Cənubi Qafqaz ölkələrinə turların sifariş edilməsində əhəmiyyətli dərəcədə artım müşahidə edirlər. Bu sırada Azərbaycanın adı xüsusi olaraq çəkilir. Düzdür, Rusiya Turoperatorlar Assosiasiyası (RTA) qeyd edir ki, rus turistlər üçün Türkiyə və Misirə tam olaraq əvəz, hələ ki, yoxdur. RTA-nın vitse-prezidenti Aleksandr Kurnosov "İzvestiya"ya bildirib: "Cənubi Qafqazın Türkiyə və ya Misirdəki kurortları əvəz edə biləcəyini demək çox tezdir". Onun fikrincə, buna səbəb Cənubi Qafqaz kurortlarında "hər şey daxil" sisteminin olmaması və dənizin Misir və Türkiyədəki ilə müqayisədə keyfiyyətidir.

Bununla yanaşı, Kurnosov qeyd edib ki, yenə də Cənubi Qafqaz turlarında nəzərəçarpacaq dərəcədə artım var. RTA-nın məlumatına görə, 2015-ci ildə Azərbaycanı 50 min rusiyalı turist ziyarət edib. Kurnosov bildirib: "Turistlər Azərbaycana Bakını gəzmək, bir neçə gün dəniz sahilində dincəlmək və yerli sanatoriyalarda müalicə olunmaq üçün gedir. Bundan əlavə, turistlər yerli mətbəxlə də maraqlanırlar".

"Rosturizm"in açıqladığı rəqəmlərə görə, bu vaxta qədər orta hesabla hər il Rusiyadan Türkiyəyə 4 milyondan çox turist gedir. Təxminən 3 milyon turist isə bu ölkədən Misirə üz tutur. Bu turistlərin hamısını Azərbaycana cəlb etmək mümkün deyil. Buna mövcud turizm potensialımız da imkan vermir. Ancaq müəyyən hissəsini cəlb etmək olar və rus turistlər özləri də Azərbaycana gəlməkdə maraqlıdır. Mütəxəssislər hesab edirlər ki, böyük sayda rus turistlərinin cəlbi üçün qiymətlərin bir qədər də endirilməsinə ehtiyac var. Həm də burada, qiymətdən başqa, keyfiyyət faktoru da rol oynayır. Ekspertlər hesab edir ki, Azərbaycan bunun üçün ən azı Türkiyədən nümunə götürərək, xidmət səviyyəsini qaldırmalı və endirimli paketlər təklif etməlidir. Mütəxəssislər hesab edir ki, bunlar həyata keçirilməsə, Rusiyadan gələn turistlərin sayında kəskin artım olmayacaq. Amma qiymət ensə, keyfiyyət yüksəlsə, həm xaricdən gələn turistlərin sayı artacaq, həm də yerli turistlər daxildə istirahətə üstünlük verəcək. Onu da qeyd edək ki, Azərbaycandan xaricə gedən turistlərin sayı heç də az deyil. Məsələn, təkcə ötən il ərzində Türkiyə Azərbaycandan 602 min nəfər turist qəbul edib. Türkiyə Otelçilər Birliyinin (TÜROB) baş katibi Uyqar Koçaş bildirir ki, Azərbaycan Türkiyə üçün potensial böyük bazarlardandır":Türkiyə azərbaycanlı turistlərin ən çox ziyarət etdiyi ölkələrdən biridir. Azərbaycanda İstanbul, Kapadokiya və digər qaynar turizm mərkəzlərinin reklam kampaniyalarını davam etdirmək önəmlidir. Türkiyə otellərinin, xüsusən Avropa və Rusiya da daxil olmaqla, əsas bazarlarda itirdiklərini bərpa etmək üçün böyük təşviqat xarakterli tədbirlər keçirdiyini deyən baş katib bildirib ki, TÜROB bu yaxınlarda Azərbaycan, Latın Amerikası və Cənubi Afrikada turizm bazarlarının tanıdılması üçün böyük turizm sərgiləri təşkil edib. Qonşu Gürcüstana da xeyli sayda soydaşımız gedir. Ümumiyyətlə, Gürcüstan Cənubi Qafqaz ölkələri ilə yanaşı, MDB, Orta Asiya və bir sıra Avropa ölkələri vətəndaşlarının səyahət etdiyi ölkələrdən biridir. Cari ilin yanvar-fevral aylarında Gürcüstana 360 mindən çox turist səfər edib. Onların da 114 mini Azərbaycan vətəndaşlarıdır. Azərbaycan bu göstərici ilə Gürcüstana gələn xarici turistlərin siyahısında birinci yerdədir. İkinci-üçüncü yerləri Türkiyə və Rusiya vətəndaşları tutur. Dincəlmək üçün Gürcüstanı seçən azərbaycanlıların sayı 2015-ci ilin eyni dövrü ilə müqayisədə 42 faiz artıb.

Gürcüstanın Turizm Agentliyinin rəhbəri Mixeil Çerkezişvili bildirib ki, Gürcüstanda qiymətlər Avropa ölkələri ilə müqayisədə baha olsa da, bir sıra ölkələrdən ucuzdur: "Bu da onları qane edir. Xarici ölkə vətəndaşlarının Gürcüstana səfər etmələrinin bir səbəbi də bizim əlimizdə olanları, musiqimizi, rəqsimizi, mətbəximizi, şərabımızı düzgün təqdim etməyimizdə, restoran və otellərdə normal xidməti təşkil edə bilməyimizdədir. Ən əsası, ölkəmizin turizm imkanlarının xaricdə düzgün şəkildə reklamının aparılmasıdır".

Qeyd edək ki, 2015-ci ildə Gürcüstana rekord həddə - 5,8 milyon nəfər turist gəlib. Turizmdən ötən il 750 milyon ABŞ dolları həcmində gəlir əldə olunub. Gürcüstan hökuməti 2025-ci ilədək turizm gəlirlərini 2,3 milyard dollara qədər yüksəltmək niyyətindədir. Bunun üçün "Gürcüstan turizminin inkişaf strategiyası" proqramı hazırlanıb. Gürcüstana gedənlər arasında azərbaycanlılar da ilk beşliyə daxildir. Həmin tursitləri daxili bazara cəlb etmək üçün qiymətlərin enməsi, keyfiyyətin artırılması vacibdir. Bu halda Azərbaycan turizmdən daha böyük miqdarda gəlir əldə edə bilər.