Azərbaycana böyük turist axını başlanır

Tarix: 09.04.2016 / 01:55
Bölmə: İqtisadiyyat

Əvvəlcədən də gözlənildiyi kimi, cari ildə Azərbaycanın turizmdən daha böyük miqdarda gəlir əldə etməsi proqnozlaşdırılır. Buna bir neçə amil təsir edir. Əvvəla, Azərbaycanda turizmdən daha böyük miqdarda gəlir əldə etmək məqsədilə zəruri addımlar atılıb, əlverişli infrastruktur yaradılıb. Digər tərəfdən təhlükəzlik və geosiyasi amillər də bu il Azərbaycana turist axınını xeyli çoxaldacaq.

Artıq bəllidir ki, bu il Azərbaycana Rusiyadan daha çox turist gəlişi gözlənir. Məsələ burasındadır ki, Türkiyə və Misir istiqamətləri 2016-cı ildə rusiyalı turistlər üçün açılmayacaq. Rusiyanın Turizm üzrə Federal Agentliyinin direktor müavini Roman Skorıyın sözlərinə görə, Türkiyə istiqaməti bu il dəqiq açılmayacaq: "Sonuncu hadisələr isə göstərdi ki, Misir də, ehtimallara görə, bu il açılmayacaq". O qeyd edib ki, Misirin hava məkanındakı uçuşların təhlükəsizliyi yalnız Rusiya turistlərinə aid deyil: "Məsələn, Böyük Britaniya və Avropanın bir çox ölkələri Misirlə hava uçuşlarının bərpasına tələsmir. Əsas problem təhlükəsizlik məsələsidir".

Bu arada Türkiyənin mədəniyyət və turizm naziri Mahir Ünalın Rusiyada 2,5 milyon turist gözlədikləri ilə bağlı fikirlərinə qarşı tərəf cavab verib. Rusiyanın Səyahət Agentlikləri Birliyinin sədri Andrey Qavrilov bildirib ki, Türkiyənin bu gözləntisi real deyil: "Türkiyə rus turistlərin sayı ilə bağlı qeyri-dəqiq hesablama aparır. Əvvəllər milyonlarla rusiyalı turist Türkiyəyə qrup şəklində satın aldıqları tur-paketlərlə gedirdi. Hazırda isə Rusiya Xarici İşlər Nazirliyinin müəyyən tövsiyələri var. Turizm sahəsində isə bu tövsiyələr Türkiyənin turizm bölgələrinə getməyi qadağan edir. Bundan əlavə, qrup yox, fərdi şəkildə səfər edən turistlərinin sayının isə 2,5 milyona çatması ehtimalı çox aşağıdır".

Qavrilov vurğulayıb ki, Ankaranın bütün cəhdlərinə rəğmən, avropalı turistlərin tətil üçün Türkiyəyə getməsi çətindir: "Hazırkı vəziyyətdə Türkiyədə təhlükəsizlik təminatının hansı səviyyədə olduğunu bilmirəm. Avropalılar bu hala çox həssas yanaşır". Qeyd edək ki, nazir Mahir Unalın sözlərinə görə, bu il Türkiyənin turist itkisinin cəmi 20% olacağını, Rusiyadan isə ölkəyə 2,5 milyon turistin gələcəyini gözləyirlər. Amma vəziyyət fərqlidir. Ekspertlərin son bir neçə ay ərzində Rusiya-Türkiyə və Rusiya-Misir münasibətlərinin gərginləşməsi, o cümlədən Türkiyənin turistlərin sıx olduğu böyük şəhərlərində baş verən partlayışlar səbəbindən Rusiyadan bu ölkələrə gedən turistlərin sayını azalacağı ilə bağlı proqnozları da özünü doğruldur. Bu fonda artıq Azərbaycana qonşu dövlətlərdən, xüsusən də İran və Rusiyadan gələn turistlərin sayında artım müşahidə olunur. Yəni belə demək olarsa, Türkiyənin rus və avropalı turistlər üçün "təhlükəli ölkə"yə çevrilməsi Azərbaycan, Gürcüstan və digər dövlətlərin qarşısında turizm imkanları açıb. Mədəniyyət və turizm naziri Əbülfəs Qarayev isə qeyd edir ki, Azərbaycanda 250-dən çox turist şirkəti fəaliyyət göstərir. 570-dən çox yerləşdirmə yeri otellər, motellər var. Azərbaycana gələn turistlər son 10 ildə təxminən 5 dəfə artıb: "Azərbaycanda turizm siyasəti dövlət səviyyəsində həyata keçirilir. Bununla biz böyük layihələrin uğurla həyata keçirilməsinə nail olmuşuq. Onların sırasında, xüsusən qeyd etmək istəyirəm ki, Azərbaycan öz turizminin inkişafı ilə bağlı proqramlarının ikisini uğurla həyata keçirib. Hazırda yeni turizm strategiyası və turizm haqqında yeni qanunun müzakirəsi artıq Milli Məclisin kommissiyalarında müzakirələrə çıxarılıb".

Mədəniyyət və Turizm Nazirliyi ölkəyə səyahət edən turistlər üçün təhlükə olmadığını da açıqlayıb. Qeyd olunur ki, xarici turistlər ölkəmizdə tam təhlükəsiz şəraitdə istirahət edə bilər: "Xarici turistlərin daha rahat şəkildə səfər etmələri üçün elektron turist vizalarının verilməsi sahəsində də tədbirlər görülür. Dünyanın istənilən ölkəsindən turist vizalarını ən geci 5 gün ərzində elektron qaydada əldə edə bilərlər. Turistlərin cəlb olunması baxımından prioritet hesab olunan ölkələrin vətəndaşları üçün hava limanlarında sadələşdirilmiş qaydada viza verilir və ölkələrin coğrafiyasının genişləndirilməsi prosesinin davam etdirilməsi nəzərdə tutulur".

Bu arada bir məqamı da qeyd edək ki, Azərbaycan 2016-cı ildə MDB ölkələri arasında rus turistlərin istirahət etmək üçün ən çox seçdikləri ölkədir. "Travel.ru" saytı yazır ki, ötən il Azərbaycan 2 milyon turist qəbul edib ki, onların da 685 mini Rusiyadandır.

Bu il isə turistlərin sayı daha çox olacaq. Mütəxəssislər hesab edir ki, qonşu ölkələrin turizmi ilə rəqabət apara bilmək üçün qiymətlərin bir qədər də endirilməsinə ehtiyac var. Həm də burada, qiymətdən başqa, keyfiyyət faktoru da rol oynayır.