“Əməkdaşlıq üçün enerji sektorundan başqa da çox yaxşı imkanlar var”. Bu barədə Azərbaycan Prezidenti İlham Əliyev Albaniyanın paytaxtı Tiranada mətbuata bəyanatında bildirib.
Ölkə başçısının sözlərinə görə, iqtisadiyyat və sənaye üzrə yaradılmış müştərək işçi qrupu tezliklə birinci iclasını keçirməlidir: “Çünki müzakirə ediləsi məsələlər çoxdur. Biz bu gün Sizinlə qaz sahəsində əməkdaşlıq barədə danışdıq, həm əldə edilmiş nailiyyətlər, həm də görüləcək işlər haqqında fikir mübadiləsi apardıq. Ancaq əməkdaşlıq üçün enerji sektorundan başqa da çox yaxşı imkanlar var - qarşılıqlı sərmayə qoyuluşu, Albaniya və Azərbaycan şirkətlərinin birgə fəaliyyəti, birgə müəssisələrin yaradılması, turizm, kənd təsərrüfatı, müasir texnologiyalar sahələri. Bilirəm ki, bütün bu sahələr Sizin ölkəniz üçün də və bizim üçün də prioritet təşkil edir. Ona görə, əminəm ki, biz bu istiqamətlər üzrə inamla addımlayacağıq”.
Görünən odur ki, Azərbaycan-Albaniya iqtisadi əlaqələri keyfiyyətcə yeni müstəviyə daxil olur.
“İki ölkə arasında iqtisadi-ticarət əlaqələrinin geniş potensiala malik olması...”
Məsələyə münasibət bildirən ekspert Rəsul Cahangirlinin fikrincə, iki ölkə arasında iqtisadi əlaqələri genişləndirmək üçün çoxsaylı imkanlar var: “Albaniya Avropanın ərazicə kiçik ölkəsi olsa da, önəmli coğrafi mövqedə yerləşir. İki ölkə arasında diplomatik münasibətlər 1993-cü ildə qurulub. İndiyə qədər Azərbaycan və Albaniya arasında 8 sənəd, o cümlədən 2013-cü il aprelin 8-də Bakıda “Azərbaycan Respublikası Hökuməti və Albaniya Respublikası Hökuməti arasında iqtisadi, sənaye və texnoloji sahələrdə əməkdaşlıq haqqında Saziş” imzalanıb. Azərbaycan və Albaniya arasında 2016-2017-ci illərdə ticarət əlaqələrində canlanma müşahidə edilib. İki ölkə arasında iqtisadi-ticarət əlaqələrinin geniş potensiala malik olması baxımından tərəflər bu sahədə əməkdaşlığın inkişafı məqsədilə birgə səyləri artırmağı məqsədəuyğun hesab edirlər. 2020-ci ilin sonlarında TAP boru kəməri vasitəsilə kommersiya qazının nəqlinə başlanılıb. Albaniya podratçı şirkətləri də TAP boru kəmərinin tikinti işlərində iştirak ediblər. TAP layihəsinin həyata keçirilməsi çərçivəsində Albaniya öz tranzit imkanlarından faydalanması ilə yanaşı, layihənin icrası Albaniyada məşğulluğun artmasına töhfə verib. Layihə, həmçinin, Albaniya üçün ÜDM və büdcə gəlirlərinin artımını təmin edib. 2019-cu il noyabrın 26-da Albaniyada baş vermiş zəlzələnin fəsadlarının aradan qaldırılması məqsədilə Azərbaycan tərəfindən humanitar yardım olaraq 500 min avro ayrılıb. Albaniya sərmayə yatırmaq üçün münasib ölkədir. Ölkənin cəlbedici turizm potensialı var”.
Vidadi ORDAHALLI
