Azərbaycanda banklar investisiya xidmətləri göstərə biləcək. Bunu Azərbaycan Mərkəzi Bankının Kapital bazarı fəaliyyətinə dair siyasət və nəzarət departamentinin direktor müavini Samir İsmayılov deyib.
O bildirib ki, maliyyə vasitəçiliyinin təkmilləşdirilməsi üçün bankların kapital bazarında iştirakı nəzərdə tutulur: “Banklar da artıq kapital bazarında xidmətlər göstərə biləcəklər. Bu isə regionlarda həm emitentlərin, həm investorların kapital bazarında iştirakını daha da genişləndirəcək. Bu istiqamətdə aktiv işlər aparılır”.
S.İsmayılov əlavə edib ki, bankların göstərəcəyi investisiya xidmətlərinin dairəsi isə AMB İdarə Heyətinin qərarı ilə təsdiq ediləcək. Bu yenilik özündə nəyi ehtiva edir?
Qeyd edək ki, investisiya bankları müxtəlif növ şirkətlər üçün borc cəlb edilməsində və ya qiymətli kağızlar emissiyasında yardımçı olur, qiymətli kağızların alqı-satqısında köməklik edir, kampaniyaların birləşməsi, udulması və yenidən qurulması işlərini gerçəkləşdirməyə kömək edir, həm institutlar, həm də şəxsi investorlara broker xidmətləri təklif edir. İnvestisiya bankları həmçinin emitentlər üçün səhmlərin yerləşdirilməsi ilə bağlı konsaltinq və bələdçilik xidmətləri həyata keçirir.
Azər Badamov: “Bankların investisiya bazarında iştirakı hər şeydən əvvəl onların öz inkişafına da ciddi təkan vermiş olacaq”
Bankların hansı formada investisiya xidməti göstərəcəyi barədə fikir bildirən millət vəkili Azər Badamov dedi ki, banklar Azərbaycan iqtisadiyyatının inkişafında yaxından iştirak etməlidir. Bu mənada bankların investisiya layihələrinin iştirakçısı olması çox mühümdür. Banklar investisiya layihələrində iştirak etməklə əlavə gəlir əldə etmiş olacaq. Bununla yanaşı, belə layihələrin icrası yeni iş yerlərinin açılması deməkdir ki, bu da məşğulluğun təmin edilməsinə öz töhfəsini verəcək. Bankların investisiya bazarında iştirakı hər şeydən əvvəl onların öz inkişafına ciddi təkan vermiş olacaq. Bu qərarla bankların fəaliyyət sahəsi əhəmiyyətli səviyyədə genişlənir ki, bu da onların kapitalının artmasına öz töhfəsini verəcək. Yeni mərhələdə bank sektorunda rəqabətli mühit daha da güclənəcək. Hesab edirəm ki, banklar tikinti sektorunda iştirak edə bilər. Həmçinin sənaye sahəsində də müxtəlif layihələrin icrasına sərmayə yatırıla bilər. Təbii ki, bu, Mərkəzi Bankla razılaşdırılaraq həyata keçirilməlidir. Sərmayənin hansı sahəyə yönəldilməsi çox mühüm məsələdir”.
Əkrəm Həsənov: “Bankların yaxın müddət ərzində investisiya xidməti göstərəcəyi inandırıcı görünmür, çünki…”
Bank sahəsi üzrə ekspert Əkrəm Həsənov bildirdi ki, investisiya xidmətinin anlayışı olduqca genişdir: “Bankların yaxın müddət ərzində investisiya xidməti göstərəcəyi inandırıcı görünmür. Çünki investisiya fəaliyyəti əsasən qiymətli kağızlara şamil olunur. Azərbaycanda isə qiymətli kağız bazarı demək olar ki, yox səviyyəsindədir. Bu səbəbdən də səhm sektoruna vəsait yatırılması qeyri-mümkün görünür”.
Günel CƏLİLOVA
