Azərbaycanda gələn il yaşayış minimumu və ehtiyac meyarının bərabər məbləğdə - 246 manat olması nəzərdə tutulur. Bu barədə "2023-cü il dövlət büdcəsi haqqında" qanun layihəsində bildirilir.
Beləliklə, 2023-cü ildə yaşayış minimumu 2022-ci illə müqayisədə 17,15%, ehtiyac meyarı isə 23% çox olacaq. Bununla da 2023-cü ildə ölkə üzrə yaşayış minimumu və ehtiyac meyarının hədləri bərabərləşmiş olacaqdır.
Eldəniz Əmirov: “Yaşayış minimumunun ehtiyac meyarına bərabərləşdirilməsi nəzərdə tutulması doğru addımdır”
İqtisadçı-ekspert Eldəniz Əmirov bildirdi ki, yaşayış minimumunun ehtiyac meyarına bərabərləşdirilməsinin nəzərdə tutulması doğru addımdır: “17 faiz artımın olması hazırkı inflyasiya şəraitində vacib addımdır. Hazırda bizdə ümumi inflyasiya göstəricisi, rəsmi statistikaya əsasən, 13 faiz üzərində olduğundan, yaşayış minimumunun 17 faiz artırılması kifayət edər. Amma bir məsələ var ki, rəsmi inflyasiya göstəricisi ilə əhalinin alıcılıq qabiliyyəti arasında real fərq var. Belə ki, məhsulların, xidmətlərin, qida inflyasiyasının yüksək həddə olması əhalinin alıcılıq qabiliyyətinə ciddi təsir göstərib”.
Rəşad Həsənov: “Müsbət haldır ki, artıq 2023-cü ildə ehtiyac meyarı və yaşayış minimumu eyni rəqəm olacaq”
İqtisadçı ekspert Rəşad Həsənov bildirdi ki, uzun müddətdir Azərbaycanda ehtiyac meyarı anlayışına yanaşmanın dəyişməsi və onun yaşayış minimumu ilə eyniləşdirilməsi müzakirə olunurdu: "Yaşayış minimumu qanunvericiliklə metodologiyası təsbit olumuş indikatordur və eyni zamanda yaşayışın minimum həddini özündə əks etdirir. Ehtiyac meyarından isə yalnız ünvanlı sosial yardımın hesablanması çərçivəsində istifadə olunur. Bununla bağlı isə ciddi metodologiya yoxdur və necə hesablanması məlum deyil. Bu, aclıq həddi göstəricisinə daha çox uyğun gəlir. Bu baxımdan davamlı olaraq təklif olunurdu ki, gəlirlərin ədalətli bölgüsü və aztəminatlı ailələrin sağlam müdafiəsi məqsədilə bu indikatorlar eyniləşdirilsin. Müsbət haldır ki, artıq 2023-cü ildə ehtiyac meyarı və yaşayış minimumu eyni rəqəm olacaq”.
Ekspertin sözlərinə görə, ünvanlı sosial yardımın hesablanması zamanı ehtiyac meyarından istifadə edilməklə ailə üzvlərinin adambaşına gəlirlərində çatışmayan hissənin kompensasiyası məqsədilə ödənilən məbləğ artıq olacaq: “Ünvanlı sosial yardım məqsədilə ayrılan vəsait əvvəlki illərlə müqayisədə yüksək olacaq və bu, yaşayış minimumu səviyyəsində ailə büdcəsinin təmin edilməsi, dolayısı ilə həmin həssas qrupların yaşayış səviyyəsinin qismən yaxşılaşmasına səbəb olacaq. Gələcəkdə də qanunvericiliyə dəyişiklik edilməli, ümumiyyətlə ehtiyac meyarı anlayışı çıxarılmalı, yaşayış minimumu göstəricisi bunu əvəzləməlidir. Ünvanlı sosial yardımın hesablanması da buna uyğunlaşdırılmalıdır".
Günel CƏLİLOVA
