Oktyabrın 25-də Ümumdünya Gömrük Təşkilatı Potensialın Gücləndirilməsi üzrə Avropa Regional Ofisində Dövlət Gömrük Komitəsi rəhbərliyinin “Trans-Xəzər” nəqliyyat dəhlizinin imkanlarının araşdırılması və öyrənilməsi məqsədilə ölkəmizdə səfərdə olan Yaponiya nümayəndə heyəti ilə görüşü keçirilib.
DGK Mətbuat və İctimaiyyətlə Əlaqələr İdarəsinin xəbərinə görə, Dövlət Gömrük Komitəsi sədrinin birinci müavini, sədr vəzifəsini müvəqqəti icra edən gömrük xidməti general-leytenantı Şahin Bağırov Yaponiya tərəfinin “Trans-Xəzər” nəqliyyat dəhlizinə maraq göstərməsini qeyd edərək nümayəndə heyətinin bu məqsədlə həyata keçirilən səfərinin uğurlu olacağını ifadə edib.
“Trans-Xəzər” nəqliyyat dəhlizinin yaranma tarixi, İpək yolunun canlandırılmasında əhəmiyyəti, Avropa ilə Asiyanı birləşdirən önəmli marşrut olduğu xüsusi vurğulanaraq diqqətə çatdırılıb ki, çoğrafi, iqtisadi cəhətdən səmərəli olan bu dəhliz beynəlxalq ticarətdə, eləcə də turizm imkanları baxımından da cəlbedicidir.
Ölkəmizin tranzit potensialının artırılması üçün gömrük prosedurlarının daha da sadələşdirilməsi və avtomatlaşdırılması, eləcə də tranzit əməliyyatları üzrə vahid məlumatın əldə edilməsi üçün aidiyyəti dövlət qurumları ilə birgə müvafiq işlərin həyata keçirildiyi diqqətə çatdırılıb.
ÜGT Potensialın Gücləndirilməsi üzrə Avropa Regional Ofisinin direktoru xanım Narynkul Tagainazar çıxışında Azərbaycanın Avrasiya məkanında müasir nəqliyyat və logistika infrastrukturunu yaratmaqda aparıcı ölkəyə çevrildiyini vurğulayaraq “Trans-Xəzər” nəqliyyat dəhlizinin bölgə ölkələri arasında iqtisadi-ticari münasibətlərin inkişafına böyük töhfə verəcəyinə əminliyini ifadə edib.
Yaponiyanın Azərbaycan Respublikasındakı Səfirliyinin müşaviri Takeya Yukihiro dünyada mövcud geosiyasi vəziyyətə nəzər salaraq bu kimi coğrafiyalardan keçən nəqliyyat dəhlizlərinin böyük önəm daşıdığını bildirib, ölkəsinin biznes subyektlərinin də “Trans-Xəzər” nəqliyyat dəhlizinə marağının yüksək olduğunu diqqətə çatdırıb.
Sonra Dövlət Gömrük Komitəsi tərəfindən “Gömrük prosedurları və əməliyyatları” mövzusunda təqdimat keçirilib və qonaqları maraqlandıran suallar cavablandırılıb.
