“Orta Asiyadan və bütövlükdə Asiyadan Qərb istiqamətinə və əks istiqamətə ötürülən yüklərin həcminin artırılması artıq yeni reallıq yaradır. Biz buna hazır olmalıyıq”. Bunu Prezident İlham Əliyev Mçxeta rayonundakı Muxrani sarayında “Qarabağ xanlığının irsi” sərgisi ilə tanışlıqdan sonra Gürcüstanın Baş naziri İrakli Qaribaşvili ilə mətbuata bəyanatla çıxış edərkən deyib.
Ölkə başçısının sözlərinə görə, Gürcüstanla Azərbaycan arasında yükdaşımaların həcmi bu il 75 faiz artıb: “Mən bildirmək istəyirəm ki, Bakı-Tbilisi-Qars dəmir yolunun ötürmə qabiliyyətini biz 5 milyon tona çatdırmaq fikrindəyik. Bu məqsədlə bu il və gələn il bu layihəyə Azərbaycan tərəfindən əlavə sərmayə qoyulacaq. Artıq bütün sərmayələr hazırdır və biz bu prosesə start vermişik. Çünki dünyada Xəzər üzərindən Azərbaycan, Gürcüstan və qonşu ölkələrdən keçən nəqliyyat yollarına böyük ehtiyac var. Yeni nəqliyyat yolları həm geosiyasi vəziyyətlə bağlı, həm də bütövlükdə yol boyunca yerləşən bütün ölkələrin maraqlarına cavab verir. Ona görə Bakı-Tbilisi-Qars dəmir yolunun ötürmə qabiliyyətinin 5 milyon tona çatdırılması, eyni zamanda, Gürcüstan limanlarından istifadə edərək Orta Asiyadan və bütövlükdə Asiyadan Qərb istiqamətinə və əks istiqamətə ötürülən yüklərin həcminin artırılması artıq yeni reallıq yaradır. Biz buna hazır olmalıyıq. Mən bildirməliyəm ki, biz Bakı Beynəlxalq Dəniz Ticarət Limanının ötürmə qabiliyyətini 15 milyon tondan 25 milyon tona çatdırmaq istəyirik. Artıq bütün göstərişlər verildi və vəsait də ayrılacaq. Ona görə Gürcüstanla Azərbaycan arasında nəqliyyat sahəsində sıx koordinasiya aparılmalıdır. Çünki bizim birgə layihələrimiz eyni vaxtda tamamlanmalıdır”.
Görünən odur ki, Azərbaycanla Gürcüstanın tranzit daşımalarda rolu getdikcə artdığı üçün iki ölkə bu sahədə fəaliyyətlərini əlaqələndirir.
“Bu yöndə işlərin maksimum sürətləndirilməsinə ehtiyac var ki, infrastruktur buna hazır olsun”
Məsələyə münasibət bildirən millət vəkili Vüqar Bayramovun sözlərinə görə, Azərbaycan və eləcə də Gürcüstanın üzərindən daşınan yüklərin həcmində artımlar müşahidə olunur: “Bir tərəfdən Azərbaycanla Gürcüstan arasında bu ilin 9 ayında yük dövriyəsi 75 faiz artıb. Başqa bir tərəfdən Azərbaycan üzərindən daşınan yüklərin həcmində 65 faiz artım qeydə alınıb. Bütün bunlar ondan xəbər verir ki, Azərbaycan və Gürcüstan regional yükdaşımalarda xüsusi paya malikdir. Nəticə etibari ilə bütün bunlar yükdaşımaların daha da artmasına öz təsirini göstərir. Eyni zamanda, iki ölkə arasında əməkdaşlıq ölkələrin reallaşdırdığı nəqliyyat layihələrinin daha effektli şəkildə istifadəsinə imkan yaradıb. Bu baxımdan Bakı-Tbilisi-Ceyhan neft kəməri, Bakı-Tbilisi-Qars dəmir yolu xüsusi əhəmiyyətə malikdir. Çünki sözügedən dəmir yolunun reallaşdırılması bölgə üzərindən daşınan yüklərin həcminə xüsusi təsir göstərdi. Nəzərə alsaq ki, bu dəmir yolu Şərq-Qərb nəqliyyat dəhlizinə inteqrasiya olunduğu üçün əhəmiyyəti daha da artıb. Ona görə ki, Avropadan Asiyaya və əks istiqamətdə yüklərin həcmində ciddi artımlar müşahidə edilir. Həmçinin, Bakı Beynəlxalq Dəniz Ticarət Limanının ötürmə qabiliyyətini 15 milyon tondan 25 milyon tona çatdırılması ilə bağlı görülən işlər də yüklərin həcminin artmasına birbaşa təsir göstərəcək. O üzdən, növbəti dövrlər üçün iki ölkə üzərindən daşınan yüklərin daha da artacağı proqnozlaşdırılır. Bu da ölkələrin beynəlxalq yükdaşımalardan daha çox gəlir əldə etməsinə imkan yaradacaq. Ona görə də bu yöndə işlərin maksimum sürətləndirilməsinə ehtiyac var ki, infrastruktur buna hazır olsun. Bu da hər iki ölkənin paralel şəkildə tədbir görməsindən keçir”.
Millət vəkili onu da əlavə etdi ki, bu istiqamətdə gedən işlər hər iki ölkənin xeyrinədir.
Vidadi ORDAHALLI
