Azərbaycan Mərkəzi Bankı ölkəyə göndərilən pul köçürmələri ilə bağlı hesabatını açıqlayıb. Hesabata görə, 2022-ci ildə Rusiyadan Azərbaycana göndərilən pul köçürmələrinin həcmində rekord artım qeydə alınıb.
Sənəddə qeyd olunur ki, ötən ilin ilk yarısında Rusiyadan Azərbaycana 261 milyon dollar vəsait köçürülmüşdü. Bu ilin ilk altı ayında isə həmin göstərici 1 milyard 283 milyon dollara yüksəlib. Belə ki, Rusiyadan Azərbaycana göndərilən pulun həcmi ötən illə müqayisədə beş dəfə artıb. Təbii ki, Rusiyadan Azərbaycana pul göndərilməsinin artmasının əsas səbəbi müharibə başladıqdan sonra sanksiyalar və rublun dəyərsizləşməsinə görə həmin ölkədə yaşayan azərbaycanlıların sahib olduqları vəsaiti kütləvi şəkildə Azərbaycana göndərməsilə bağlıdır.
Məlumat üçün qeyd edək ki, Rusiyadan Azərbaycana göndərilən pul həcmi ikinci rübdə daha çox olub. 2022-ci ilin ilk üç ayında Rusiyadan Azərbaycana 99 milyon dollar həcmində pul göndərilib. Bu, hətta 2021-ci ilin eyni dövrü ilə müqayisədə 20 milyon dollar az vəsait demək idi. Növbəti üç ay ərzində göndərilən vəsaitin həcmi isə 1 milyard 185 milyon dollar olub. Ötən il boyunca bütün ölkələrdən Azərbaycana 1 milyard 133 milyon dollar göndərilibmiş.
Rusiya ilə Ukrayna arasında yaşanan müharibə Rusiyadan Azərbaycana göndərilən pulların həcminin artmasına səbəb olub. Rusiyadan Azərbaycana göndərilən pulun həcmi ötən illə müqayisədə beş dəfə artıb.
“Son zamanlar Rusiya valyutasının məzənnəsi dollara nisbətən bahalaşıb, bu da ölkədən pul çıxarılmasına təsir edən amillərdən biridir”
Iqtisadçı ekspert Xalid Kərimli “Bakı-Xəbər”ə açıqlamasında qeyd etdi ki, Rusiyadan Azərbaycana pul köçürmələrinin artma səbəbi həmin ölkənin Ukrayna ilə müharibə şəraitində olmasıdır: “Rusiyadan Azərbaycana pul köçürmə daha çox cari ilin ikinci rübündə qeydə alınıb. Bunun da səbəbi həmin ölkəyə tətbiq edilən maliyyə sanksiyalarıdır. Sanksiyalardan yayınmaq istəyən şəxslər ölkədən pul çıxardır. Həmin ölkədə yaşayan həmvətənlərimiz əllərində olan vəsaiti Azərbaycana, burda yaşayan doğmalarına göndəriblər. Hətta müxtəlif ödəmələri həyata keçirmək üçün şirkətlərin bəzilərinin qeydiyyatı Rusiyadan Azərbaycana köçürülür. Onu da nəzərə almaq lazımdır ki, Azərbaycan sanksiyalardan kənarda olduğu üçün həmin ölkənin vətəndaşları pullarını sanksiyanın tətbiq olunmadığı ölkədə saxlamağa üstünlük verir”.
Həmsöhbətimiz onu da əlavə etdi ki, köçürülən vəsaitlərin əksəriyyəti Rusiyada yaşayan azərbaycanlıların hesabınadır: “Onu da qeyd edim ki, son zamanlar Rusiya valyutasının məzənnəsi dollara nisbətən bahalaşıb. Bu da ölkədən pul çıxarılmasına təsir edən amillərdən biridir”.
Günel CƏLİLOVA
