Məlum olduğu kimi, Rusiya müəyyən müddətdir məhdudiyyətlə həyata keçirdiyi taxıl ixracını bir həftədir tamamilə dayandırıb. Rəsmi məlumata görə, Azərbaycan taxıla olan tələbatının 15 faizini idxal hesabına təmin edir. Rusiya taxılı Azərbaycanın ehtiyacının təxmini 7 faizini ödəyir. Bu səbəbdən Rusiyadan taxıl asılılığımız olmasa da, lakin qərar psixoloji təsirlərə və xüsusilə də işbazların fırıldaqlarına zəmin yarada bilər.
Maraqlıdır, Rusiyanın taxıl ixracını dayandırması bu ölkənin əsas taxıl idxalçılarından biri olan Azərbaycanda hansı problemlər yarada bilər?
"Rusiyanın taxıl ixracını tam dayandırması Azərbaycana təsir etməyəcək". Bunu jurnalistlərə açıqlamasında kənd təsərrüfatı naziri Heydər Əsədov deyib. Onun sözlərinə görə, Rusiya taxıl üçün nəzərdə tutulan ixracın 90 faizini artıq yerinə yetirib. Onların nəzərdə tutduğu və Azərbaycana təsir edə biləcək xüsusi bir ixracı qalmayıb: "Biz daim beynəlxalq trendləri araşdırırıq. Həm Avropa bazarında, həm də Amerika bazarlarındakı taxılın qiymətlərini izləyirik. Bu il dünya üzrə taxıl ehtiyatlarının həcmi 7 milyon ton artıb. Bu göstərici taxılla bağlı ciddi bir narahatlığın olmadığını göstərir. Ötən il bu ehtiyatlar 30 milyon artmışdı. Bu isə qiymətlərin düşməsinə səbəb olmuşdu. Bizim hər hansı bazarla əməkdaşlıq etmək imkanımız var. Dünya taxıl ehtiyatlarının azalmaması fonunda qiymətlərin artacağını gözləmirik".
Sözügedən məsələni dəyərləndirən kənd təsərrüfatı üzrə mütəxəssis Vahid Məhərrəmov məsələyə fərqli prizmadan yanaşdı: "Rusiyanın İqtisadi İnkişaf Nazirliyi yeni bir layihə hazırlayıb. 2015-ci ilin fevral ayının 1-dən buğda ixracına 15 faiz, habelə hər ton üçün 7,5 avro rüsum tətbiq edilməsi barədə qərar layihəsi hazırlayıb. Bu layihəyə görə, bir ton buğdanın ixracının indiki qiymətindən ən azı 35 avro baha olacağı nəzərdə tutulur. O zaman idxal etdiyimiz taxılın bir hissəsi bizə baha başa gələcək. İndi çalışırlar ki, taxıl məhsullarının bir hissəsini Ukraynadan alsınlar. Rusiyanın yeni qərarı bizim daxili bazarımıza təsir edəcək, qiymətləri nisbətən artıracaq. Bundan digər taxıl istehsalçısı olan ölkələr sui-istifadə edə bilər. Məsələn, Qazaxıstan qiymətləri qaldıra bilər. Gələn il çörəyin bahalaşıb-bahalaşmayacağını reallıq göstərəcək. Buğdanın bir tonu üçün 35 avro bahalaşma az məbləğ deyil. Belə olan halda, buğdanın qiyməti 35 faizdən çox bahalaşa bilər. O zaman bunun çörəyin qiymətinə təsiri qaçılmazdır. Əlbəttə, bu, Rusiyadan başqa bazar tapılmayacağı təqdirdə baş verə bilər. Məhsulun qiyməti bir dəyər zəncirində artırsa, bu özünü digər zəncirlərdə də göstərməlidir".
